Ti anôk čhĭ mnia krah ƀuôn prŏng Ƀuôn Ama Thuôt – anôk mkăp brei prŏng hĭn mơ̆ng čar Dak Lak, rang čhĭ thiăm lu mta mnơ̆ng guôp găl hŏng wưng blei ba yua knhal jih thŭn. Lu hĭn jing dŭm mta čhŭm ai, hdruôm jơ̆ng, jep čŭt, ƀêñ kẹo…Amai Đoàn Thị Phong, čhĭ čhum ao ti wăl B, sang čhĭ mnia prŏng ƀuôn prŏng Ƀuôn Ama Thuôt brei thâo:

 “Thŭn anei hmei mprăp mnơ̆ng dhơ̆ng tết đĭ truh 20% mkă hŏng grăp thŭn, kâo ăt rang čhĭ mnơ̆ng dhơ̆ng čiăng čhĭ kơ êdei thŭn mrâo leh anăn čhĭ wăt kơ tết. Hmăng hmưi klei blei ba yua srăng đĭ hĭn, čhĭ mnia pral hĭn. Ênoh thŭn anei jig ênoh êlưih, mnơ̆ng dhơ̆ng mâo lu mta. Thŭn anei, boh mnga bruă lŏ hma ti alŭ wăl jing mâo ƀiă, hmei hmăng hmưi hlăm wưng tết arăng srăng blei lu hĭn”.

Hluê si amai Lưu Thị Hồng Hạnh, pô sang anôk čhĭ mnia ti wăl C, anôk čhĭ mnia prŏng Ƀuôn Ama Thuôt, dŭm thŭn giăm anei, arăng amâo mâo lo bi blei lu msĕ hŏng êlâo ôh, phung blei ăt dlăng kơ hnơ̆ng tŭ jăk mnơ̆ng dhơ̆ng lu hĭn kyuanăn phung čhĭ mnia ăt ruah mă dŭm mta mnơ̆ng thâo klă phŭn agha, rơ̆ng kơ hnơ̆ng tŭ jăk čiăng čhĭ kơ mnuih ƀuôn sang:

 “Ênoh ênil thŭn anei ăt mâo klei hơĭt, mâo klei hrŏ ƀiă. Klă sĭt dŭm mta mnơ̆ng thơ̆ng dŭm anei jing lu jơr. Hlăm wưng kâo mă mnơ̆ng dhơ̆ng čiăng čhĭ kơ mnuih ƀuôn sang wưng tết, kâo mâo leh dŭm mta mnơ̆ng mâo tem, mâo hră hrah, bi klă doh êbăt hŏng bêñ kẹo, jih jang dŭm mta mnơ̆ng ƀơ̆ng kyuanăn mnuih ƀuôn sang brei mâo klei hơĭt”.

Čiăng mkăp kơ wưng Tết Giáp Thìn thŭn anei, dŭm knơ̆ng bruă, phung mkăp brei ti čar Dak Lak ăt čŏng pô mkăp bi mâo mnơ̆ng dhơ̆ng, bi klă klei kuôl kă hŏng phung mkăp brei mâo klei đăp knang čiăng rơ̆ng kơ hnơ̆ng tŭ jăk. Dŭm sang čhĭ mnia prŏng ti Dak Lak ngă leh dŭm hdră êlan čhĭ êlưih hŏng lu hdră đru kơ ênoh msĕ si: bi hrŏ ênoh čhĭ, mklin puăng, brei hră blei mnơ̆ng, mâo mnơ̆ng brei, blei 2 brei 1…

Hluê si Bùi Văn Quân, khua kiă kriê sang mnia mblei prŏng Go Ƀuôn Ama Thuôt, truh kơ ară anei, sang mnia mprăl ênŭm leh mnơ̆ng dhơ̆ng kơ tết, hŏng jih jang mnơ̆ng dhơ̆ng truh kơ giăm 23 êklai prăk.

 “Sang mnia mblei prŏng mâo hdră êlan mprăp êlâo 2 mlan. Thŭn anei, hmei čŏng pô mkăm pioh mnơ̆ng dhơ̆ng đĭ 10% mkă hŏng thŭn êlâo, hdră êlan mơ̆ng hmei thŭn anei bi hrŏ ênoh kpiê biêr truh kơ 50% kyua klei čiăng ba yua mơ̆ng leh anăn dŭm hdră êlan mơ̆ng knŭk kna. Hmei mđĭ thiăm dŭm sang hjiê bi êăt leh anăn mă bruă hŏng phung mkăp brei mprăp mnơ̆ng dhơ̆ng kơ Tết”.

Hluê si Nguyễn Văn Nghiêm, k’iăng khua kiă kriê knơ̆ng bruă tuh tia čar Dak Lak, klei čiăng ba yua hlăm wưng Nguyên đán Giáp Thìn 2024 ti čar Dak Lak mĭn tĭng đĭ hlăm brô 15%. Dhar bruă tuh tia gĭt gai dŭm anôk bruă mnia mblei ti alŭ wăl mâo hdră êlan mkăm pioh mnơ̆ng dhơ̆ng, rơ̆ng kơ hnơ̆ng tŭ jăk, ênoh djŏ leh anăn mñă kơ dŭm knơ̆ng bruă bi hơĭt ênoh, ƀuăn amâo mâo brei klei kƀah mnơ̆ng dhơ̆ng, mđĭ ênoh. Mbĭt hŏng anăn, hluê ngă dŭm bruă mtrŭt mđĭ klei ba yua, mkŏ mjing dŭm knăm mnia mblei, rang mfah, anôk čhĭ mnia mnơ̆ng dhơ̆ng krĭng ƀuôn sang… Nguyễn Văn Nghiêm brei thâo:

 “Truh kơ ară anei mâo 11 knơ̆ng bruă nao hgŭm hlăm hdră bi hơĭt ênoh dŭm mta mnơ̆ng čiăng êdi. Jih kang giăm 500 êklai prăk, ka yap ôh phung mnia mblei, gŏ sang čhĭ mnia ti alŭ wăl čar. Thŭn anei mâo klei găl hĭn, anăn jing dŭm knơ̆ng bruă mprăp lu mnơ̆ng dhơ̆ng, lu jơr kơ mta mnơ̆ng dhơ̆ng, rơ̆ng klei doh êƀăt. Mbĭt anăn hmei ăt mă bruă hŏng dŭm knơ̆ng bruă, dŭm alŭ wăl kƀah mnơ̆ng dhơ̆ng srăng ba mnơ̆ng dhơ̆ng truh kơ anôk mâo klei čiăng”.

Klei mprăp klă nik mơ̆ng phung čhĭ mnia, knơ̆ng bruă leh anăn dŭm anôk bruă djŏ tuôm jing klei bi knăl jăk čiăng mtrŭt mđĭ klei blei ba yua, mkŏ mjing klei găl hĭn kơ mnuih ƀuôn sang Dak Lak drông tết kluôm ênŭm, êđăp ênang./.