Ară anei, bruă blei mnơ̆ng yua đĭng blŭ thâo mĭn yua mã QR tĭng tla amâodah mơĭt hlăm knơ̆ng prăk mâo leh lu hlăm dŭm sang mnia mơ̆ng đưm ti ƀuôn prŏng Ƀuôn Ama Thuôt. Đinh Thị Thanh 60 thŭn, ti ƀuôn hgŭm Tự An brei thâo, dŭm thŭn êlâo tơdah nao sang mnia blei mnơ̆ng mprăp sa ênoh prăk lu pioh tla ti kngan. Khădah giăm 2 thŭn anei, dŭm klei mnia blei amâo yua prăk hla ôh, hrô kơ anăn jing yua đĭng blŭ hŏng mrô QR amâodah mơĭt hlăm knơ̆ng prăk. Ñu lač bruă tĭng tla msĕ si ară anei klă sĭt găl ênưih:

  “Kâo mă bruă prăk mlan jih thŭn mă bruă snăn mơ̆ng sui truh ară anei hlăm knơ̆ng prăk, êlâo dih nao sang mnia brei phung anak čô mă prăk hlăm ATM. Ƀiădah ară anei ya dŏ čiăng blei kâo yua mrô QR, amâo guôn nao mă prăk tla ôh. Kâo nao sang mnia Phan Chu Trinh, Tân An, amâodah wăl krah ƀuôn prŏng Ƀuôn Ama Thuôt, lu phung mnia blei čhĭ djam tam, čĭm kan, čhum ai mâo soăi mrô QR kđăm hlăm mơar amâodah hlăm đĭng blŭ kơ phung blei tla. Kâo ƀuh găl ênưih snăk, amâo huĭ srăng êbeh, kƀah amâodah čhuai ôh.”

Nguyễn Thị Liên, leh giăm 20 thŭn čhĭ boh kroh djam tam ti sang mnia Tân An, ƀuôn prŏng Ƀuôn Ama Thuôt brei thâo, ñu hriăm hdră tĭng tla amâo yua prăk hla mơ̆ng phung mnia blei riêng gah. Bruă tĭng tla mrô dưi msir mgaih lu bruă kơ phung mnia blei leh anăn phung blei mnơ̆ng dhơ̆ng.

   “Phung blei mnơ̆ng diñu blei tla prăk hla snăn lŏ bi wĭt prăk êbeh ăt sui mơh. Mâo lu phung blei tla 20 êbâo amâodah 30 êbâo, leh anăn diñu brei prăk 500 êbao pô amâo mâo prăk lŏ wĭt snăn nao mlih, dleh dlan hĭn. Bruă yua mtô QR tĭng tla snăn ênưih hĭn. Kâo čang hmăng bruă tĭng tla hlăm QR snăn brei pŏk mngă lu hĭn čiăng kơ mnuih ƀuôn sang ênưih hĭn mnia blei. Kyua lu blư̆ lŏ ba wĭt prăk êbeh čhuaih kơ arăng, bi yua mrô QR snăn amâo dưi čhuaih ôh leh anăn ênưih hĭn kơ tla prăk hla.”

 Hlue si Knơ̆ng prăk knŭk kna Việt Nam ti Dak Lak, leh giăm 2 thŭn pŏk ngă hdră bruă mđĭ kyar tĭng tla amâo yua prăk hla ti Việt Nam wưng 2021-2025”, truh ară anei, dŭm knơ̆ng prăk ti Dak Lak pŏk leh êbeh 2.600.000 anăn mnuih yua hlăm knơ̆ng prăk. Hnơ̆ng đĭ kyar kah knar yua anăn hlăm đĭng blŭ mâo 50 – 80%/thŭn, ênoh mnuih, êpul bruă yua hdră tĭng tla amâo yua prăk hla hlăm dŭm hdră điện tử mâo 40%. Dŭm hdră bruă mdrao mgŭn, sang hră mâo hlăm brô mkrah wah mnuih, êpul bruă yua hdră tĭng tla điện tử, tla prăk đih sang êa drao, hriăm hră amâo yua prăk hla.

Phùng Thị Thơm – K’iăng Khua adŭ bruă hâo hưn mtô mblang, Knơ̆ng bruă hâo hưn mtô mblang Dak Lak brei thâo, kluôm čar mkŏ mjing leh 1.426 êpul kdrăp mrâo êpul êya, hŏng 9.278 čô hgŭm. Dŭm êpul bruă anei srăng đru kơ bruă mlih mrô, dưm hlăm anăn điện tử VNeID; ktrâo lač kơ gŏ sang mnia blei, mnuih ƀuôn sang ti alŭ wăl čih anăn yua tĭng tla amâo yua prăk hla, ktrâo lač mkŏ mjing anăn hlăm knơ̆ng prăk leh anăn ngă hră mơar online... Thơm brei thâo:

 “Knơ̆ng bruă sang čư̆ êa čar mkŏ mjing leh dŭm êpul bruă kdrăp mrâo êpul êya mơ̆ng čar truh kơ kdriêk, să leh anăn dŭm alŭ, ƀuôn amâodah êpul mnuih ƀuôn sang. Thŭn 2024 Knơ̆ng bruă srăng pŏk ngă hdră tă leh anăn ktrâo alč kơ dŭm să, ƀuôn hgŭm hlăm dŭm êpul bruă kdrăp mrâo êpul êya anei mđĭ lar jăk hĭn bruă ktrâo lač mnuih ƀuôn sang tĭng tla amâo yua prăk hla”./.