VOV4.Êđê - Ƀri bi hdơr 67 thŭn Hruê phung nai aê mdrao Việt Nam 27/2, hruê 25/2, Êpul mă bruă mơ̆ng anôk bruă Đảng čar, Anôk bruă sang čư̆ êa čar Dak Lak nao čhưn, h’êč hmưi phung khua kiă kriê, êpul phung nai aê mdrao mơ̆ng Knơ̆ng bruă mdrao mgŭn, Anôk bruă ksiêm dlăng klei ruă tưp čar lehanăn Sang êa drao prŏng krĭng Lăn dap kngư. Ti knơ̆ng bruă mdrao mgŭn, Nguyễn Đình Trung, Khua hlăm anôk bruă Đảng gưl dlông, Khua bruă Đảng čar hmư̆ leh phung khua knơ̆ng bruă mdrao mgŭn hưn mthâo leh hdră mă bruă hlăm wưng êgao.

Ti anăp klei ruă Covid 19 dôk mâo dleh dưi ksiêm dlăng, Knơ̆ng bruă mdrao mgŭn dôk iêu mtrŭt djăp ai dưi mkăp kơ hdră gang mkhư̆ klei ruă Covid 19. Ară anei, jing jang sang êa drao, anôk mdrao mgŭn gưl kdriêk mkŏ mjing leh krĭng dŏng mdrao Covid 19 kơ mnuih ruă hluê gru hmô mdrao mgŭn nah gŭ “Mdrao klei ruă aguah tlam êjai lehanăn mdrao mnuih ruă Covid 19 êjai”. Blŭ hrăm ti knăm anei, Khua bruă Đảng čar Nguyễn Đình Trung ba m’ĭt leh asăp h’êč hmưi truh kơ jih jang knuă druh, mnuih mă bruă mdrao mgŭn’ čih yap dŭm boh tŭ dưn dưi mâo hlăm wưng êgao đru mguôp leh yuôm bhăn čiăng kơ čar bi leh jih hnơ̆ng čuăn mđĭ kyar bruă duh mkra – ala ƀuôn, boh nik ksiêm dlăng kjăp klei ruă Covid 19 ti alŭ wăl./.

H’Nêc pô mblang