VOV4.Êđê- Mơ̆ng akŏ thŭn truh kơ ară anei, kluôm čar Dak Lak mâo 666 čô mniê ba tian djŏ klei ruă Covid 19, hlăm anăn mâo 3 čô djiê. Phung mniê ba tian hlăm mmông kkiêng arưp mâo lu klei huĭ hyưt, phung mniê ba tian djŏ Covid 19 hĭn mơh lŏ huĭ hyưt hĭn.

 Dôk hlăm adŭ dôk guôn kkiêng anak hŏng čhiăm guôm ƀô̆ leh anăn ală kĭng mgang ƀô̆ mta, hmư̆ ênai tiê boh anak hlăm masin mkă hnơ̆ng tiê boh, tăp năng amai Nguyễn Thị Bích Thuỷ, ti kdriêk Ea Hleo, čar Dak Lak lŏ ruă snăk kyua anak ĭ kpư̆ hlăm tian. Amai Thuỷ brei thâo, dua čô ung mô̆ sui mâo anak, leh bi dôk 15 thŭn kơh mâo tian. Amâo bi mĭn ôh, knŏng leh wưng kkiêng 3 hruê, amai Thuỷ djŏ Covid-19. Ba tian hlăk 42 thŭn, lŏ djŏ Covid-19 anăn amai Thủy rŭng răng snăk:

          “Dŭm hruê ƀuh bi dăl adŭng mĭndah kyua bi mlih yan adiê anăn hdrak ngă amâo đing ôh djŏ Covid, ăt rŭng răng, aê mdrao mrâo hriê lač tơdah amâo thâo kkiêng snăn hlăm brô 6 truh 8 mmông mmăt srăng mbliah mă anak ĭ, kâo čang hmăñg dưi kkiêng srăng suaih hĭn.”

 Ăt ti Sang êa drao, Nguyễn Thị Kiều Trinh ti kdriêk Čư̆ Mgar, čar Dak Lak brei thâo, leh 3 hruê djŏ Covid-19, mtâo mniê ñu mâo klei bi knăl truh hrue kkiêng anăn gŏ sang ba ti sang êa drao. Myun mơh kyua mâo gŏ sang mđĭ ai leh anăn phung aê mdrao jih ai tiê kriê dlăng, snăn ñu kkiêng leh jăk.

 “Leh hriê tinei bi tuôm hŏng phung aê mdrao. Mơ̆ng aguah ăt kyua mâo phung aê mdrao ăt kâo dưi bi tuôm hŏng mtâo kâo, ară anei dưi mŭt, ƀuh leh čô mơak snăk. Ară anei knŏng bi mni lač jăk kơ aê mdrao lu amâo thâo lŏ lač ôh, amĭ pral anak suaih jăk leh”

Mniê ba tian Thuỷ hlăm adŭ dôk guôn kkiêng anak

 Hlue si ênoh ksiêm yap mơ̆ng Knơ̆ng bruă mdrao mgŭn čar Dak Lak, yap mơ̆ng hruê 1/12022 truh hruê 17/3/2022, kluôm čar mâo 666 čô mniê ba tian djŏ Covid-19, hlăm anăn mâo 3 čô mniê ba tian djiê. Sang êa drao prŏng krĭng Lăn Dap Kngư bi mlih bruă ba yua wăl sang E jing anôk mdrao kơ phung mniê ba tian djŏ Covid-19 kñăm ktuê dlăng klei bi knăl, mlan anak ĭ, boh klei anak ĭ čiăng thâo msir mgaih êđăp ênang, djŏ mmông. Ară anei anôk anei dôk mdrao kơ êbeh 20 čô mniê ba tian hlăm wưng dôk guôn kkiêng leh anăn leh kkiêng.

Êlâo anăn, hlăm thŭn 2021, hlăk êjai klei ruă Covid-19 dleh ktuê dlăng leh anăn huĭ hyưt, Sang êa drao prŏng krĭng Lăn Dap Kngư đru leh 4 čô mniê ba tian djŏ Covid-19 dưi kkiêng anak êđăp ênang. Hlăm anăn, mâo sa čô bŏ hŏng huĭ hyưt, phung aê mdrao mă anak ĭ čiăng dŏng hdĭp amĭ. Anăn jing mniê ba tian kkiêng thŭn 1992, ƀuôn Sinh A, să Ea Drông, wăl krah ƀuôn Hồ, čar Dak Lak. Leh bi mklă djŏ Covid-19, dôk ba tian hlăm hruê kăm tal 33, arăng ba ñu mdrao ti Sang êa drao hnak leh anăn ksŏ čar. Kyua mnuih ruă mâo klei truh kjham, dleh bi êwa anăn dưi ba ti anôk mdrao Covid-19 ti Sang êa drao prŏng krĭng Lăn Dap Kngư. Tinei, ñu dưi đru bi êwa hŏng masin, mkhư̆ êkŏ êrah, corticoide, mbŏ mnơ̆ng tŭ jăk. Ƀiădah mnuih ruă truh kjham, dleh bi êwa suăi hĭn anăn Sang êa drao ngă klei ksiêm dlăng čiăng bi mklă mă anak ĭ dŏng hdĭp amĭ.

Tring drông mtâo mniê mrâo kkiêng wĭr kơ anôk mdrao phung djŏ Covid-19

        Hlue si aê mdrao Chuyên khoa II Trần Ngọc Thắng, K’iăng Khua kriê dlăng phung mniê ba tian Sang êa drao prŏng krĭng Lăn Dap Kngư, sĭt djŏ Covid-19, phung mniê ba tian ênưih mâo klei truh kjham lu hĭn phung mkăn kyua êjai ba tian, phung mniê hrŏ klei dưi mdrơ̆ng hŏng klei ruă tưp. Kyua rông 1 čô hđeh hlăm tian anăn klei čiăng oxy mơ̆ng phung mniê ba tian lu hĭn mnuih mkăn.  Tơdah djŏ Covid-19, ksŏ phung mniê ba tian srăng mâo kman ngă, klei anei hmaĭ lu kơ klei suaih pral phung mniê ba tian leh anăn anak ĭ, boh nik ngă huĭ hưt kơ klei hdĭp amĭ leh anăn anak.

 “Virus COVID ngă kơ êlan bi êwa jing phŭn leh anăn êlan bi êwa djŏ tuôm kơ klei hdĭp phung mniê ba tian snăn sĭt mâo klei arưp kơ klei hdĭp snăn hmei srăng ngă bruă. Ngă bruă tinei jing mđing kơ amĭ tal êlâo leh anăn kơ yap mlan anak ĭ. Sui hŏng anei 2 hruê mâo sa čô mniê ba tian 33-34 hruê kăm, ƀiădah ñu mâo klei bi knăl dleh bi êwa snăn hmei bi mklă mbliah mă anak ĭ čiăng mdrao klei dleh bi êwa kơ amĭ.”

 Grăp blư̆ kkiêng anak jing klei huĭ hyưt truh kơ djiê. Klei huĭ hyưt ƀrư̆ đĭ tơdah phung mniê ba tian amâo myun djŏ Covid-19. Kyua anăn, čiăng rơ̆ng klei suaih pral phung amĭ leh anăn anak điêt ăt srăng ñĕ kơ klei huĭ hyưt hlăk êjai ba tian, phung mniê ba tian djŏ Covid-19 brei ktuê dlăng klei suaih pral pô kjăp hĭn, sĭt ƀuh klei bi knăl amâo jăk brei nao đih mdrao ƀrư̆ hnưm ƀrư̆ jăk./.

Pô mblang: H’Zawut Ƀuôn Yă