Phung bi ala hmư̆ dŭm anôk bruă thơ̆ng ktrâo lač kơ boh phŭn duh kơ bruă ruah khua, mâo: Bruă mnuih mă bruă (Anôk bruă mkŏ mjing Bruă Đảng čar); mkŏ mjing klei bi kƀĭn phung bi ala kơ mnuih ƀuôn sang, klei kuôl kă, hưn mthâo pô mgơ̆ng asei Knơ̆ng bruă mặt trận čar kwar Việt Nam čar); mkŏ mjing, kriê dlăng leh anăn ksiêm dlăng klei tĭng tla ruah khua (Knơ̆ng bruă ngăn prăk); bruă mkŏ mjing klei ruah khua (Knơ̆ng bruă kriê dlăng bruă knuă); bruă mkăp mrô kđăm, rơ̆ng êđăp ênang yang ƀuôn (Kahan ksiêm čar); leh anăn bruă hâo hưn mtô mblang ruah khua (Knơ̆ng bruă Dhar kreh, mjuăt asei mlei leh anăn hiu čhưn ênguê).

 Lương Nguyễn Minh Triết, Khua dlăng bruă Đảng čar, Khua Anôk bruă gĭt gai klei ruah khua čar Dak Lak mtă, ară anei jih bruă kđi čar dôk ngă lu bruă yuôm bhăn, boh nik msir klei jhat êa lip lêč ngă, dŭm gưl, dhar bruă brei mđĭ ai tiê bruă klam, ngă bruă mjêč, kreh knhâo, “ngă lu hĭn dua blư̆, tlâo blư̆” čiăng hơĭt klei hdĭp mda, mkra mjing yang ƀuôn, pŏk ngă jăk bruă ruah khua.