VOV4.Êđê- Sa thŭn hriăm mdê bhăn hŏng lu wưng hriăm online, ngă kơ lu hđeh sang hră adŭ 12 ti Dak Lak rŭng răng kơ klei bi lông hriăm jih gưl 3 thŭn 2022. Čiăng kơ phung hđeh hơĭt ai tiê hlăm klei hriăm hră mơar, lu sang hră gưl 3 hnưm tă hdră bi hriăm phung hđeh hriăm ruê̆ gưl 3. Ti Sang hră gưl 3 Lê Qúy Đôn, ƀuôn prŏng Ƀuôn Ama Thuôt, čar Dak Lak, êbeh 530 čô hđeh sang hră adŭ 12 hriăm online hlăm jih thŭn anei.

Čiăng đru kơ hđeh sang hră knhal jih gưl, sang hră mkŏ mjing leh klei ksiêm dlăng mbha hnơ̆ng thâo mơ̆ng hđeh čiăng mbha adŭ leh anăn mâo hdră kčah mtô bi hriăm klă klơ̆ng. Gưl bi lông hriămjih gưl 3 thŭn 2022 mĭn tĭng srăng mkŏ mjing mơ̆ng hruê 7 truh hruê 11/7/2022. Hlăm boh klei ruă tưp dleh ktuê dlăng ti dŭm alŭ wăl, klei bi lông srăng bi kdung mkŏ mjing lu gưl mdê mdê msĕ si klei bi lông hriăm jih gưl 3 thŭn 2021.  Truh wưng anei, lu sang hră gưl 3 ti Dak Lak pral mâo dŭm hdră mtô bi hriăm kơ hđeh sang hră čiăng kơ phung hđeh jhŏng mŭt hlăm klei bi lông hŏng klei tŭ jăk hĭn.

Pô mblang: H’Zawut Ƀuôn Yă