VOV4.Êđê - Klei hdĭp wĭt hlăm wưng aguah tlam mrâo, dŭm knơ̆ng bruă hlăm leh anăn êngao čar Dak Lak dôk mtrŭt mđi tui duah mnuih mă bruă čiăng krŭ wĭt klei ngă bruă, klei găl mâo bruă mă dưi pŏk kơ mnuih mă bruă čar anei.

Djă hră hưn djŏ klei hrŏng ruah nao mă bruă kơ ala čar Japon, Nguyễn Anh Tú, ti alŭ Hiệp Thắng, să Quảng Hiệp, kdriêk Čư̆ Mgar, čar Daklak, brei thâo, leh hriăm ruĕ bruă mkra êdeh ôtô ti sang hră gưl krah bruă knuă čar Daklak mơ̆ng mlan 7/2021, ñu mă leh bruă hlăm đa đa anôk, ƀiădah bruă knuă amâo mâo hơĭt ôh. Leh hmư̆ mâo klei tiŏ nao mnuih nao mă bruă kơ ala tač êngao, snăn ñu ngă hră akâo nao ti anôk bruă duah brei bruă knuă čar Daklak. Leh dua gưl êmuh kña snăn ñu mâo sa boh knơ̆ng bruă mơ̆ng Japon ruah. Hlăm mlan 3 ñu nao kơ ƀuôn prŏng Hồ Chí Minh hriăm klei blŭ Japon lehanăn djăp mta bruă čiăng pioh kơ klei nao ngă bruă “Kâo ăt nao mă bruă kơ ala tač êngao, kâo ciăng nao kơ Japon tui duah sa ênoh prăk mlan hơĭt hĭn leh dŭm thŭn srăng dưi duh mĭn kơ klei hdĭp pô. Hlăm wưng kơ anăp kâo gĭr hriăm klei blŭ Japon čiăng pral mâo nao kơ Japon’.

Leh sa wưng tui duah djăp mta hdră arăng hrŏng ruah mnuih ngă bruă, amai La Thị Thanh, ti alŭ mrô 2, să Hoà Thuận, ƀuôn prŏng Ƀuôn Ama Thuôt ăt pral mâo duah bruă djŏ guôp hŏng pô ti knơ̆ng bruă hiu čhưn ênguê Daklak. Amai brei thâo: Bruă kâo hriăm jing bruă tĭng mkă ngăn prăk anôk bruă duh mkra, snăn kâo pŏk hlăm hla pŏk web amâodah hlăm ap klei hâo hưn duah bruă knuă, snăn kâo ƀuh mâo bruă jing djŏ hŏng kâo hriăm leh. Snăn kâo akâo kơ knơ̆ng bruă hiu čhưn ênguê čar Daklak mâo bruă knuă anôk kăp hrui ngăn prăk jing giăm hŏng bruă kâo hriăm snăn kâo čiăng lông ngă bruă kơ anăn”.

Truh kơ anôk tui duah bruă knuă mă ti čar Daklak, Lê Nguyên Phúc, Khua adŭ bruă kơ ênoh mnuih mơ̆ng knơ̆ng bruă Hoa Xuân Vina truăn kơ bruă mkra mjing hdruôm jơ̆ng ti alŭ wăl duh mkra Nhơn Trạch, čar Đồng Nai brei thâo, knơ̆ng bruă hgŭm leh hŏng čar Daklak êbeh 7 thŭn hŏng anei, mâo yua leh êbeh 5 êbâo čô mă bruă mơ̆ng čar. Ară anei knơ̆ng bruă hlăk hgŭm hŏng dŭm knơ̆ng bruă sang čư̆ êa alŭ wăl čiăng hrŏng ruah mâo sa ênoh lu mnuih ngă bruă. “Knơ̆ng bruă hlăk dôk čiăng kơ mnuih ngă bruă mơ̆ng 1 êbâo truh 2 êbâo čô mnuih mơ̆ng 18 thŭn kơ dlông. Hŏng prăk mlan hlăm brô mơ̆ng 6 – 14 êklăk prăk, lŏ mâo dŭm ênoh đru mdul mkăn mơ̆ng knơ̆ng bruă, mbĭt hŏng anăn knơ̆ng bruă lŏ mâo dŭm bruă đru ba kơ klei tŭ dưn mnuih ngă bruă msĕ si pah mni truh 3 êklăk prăk kơ mnuih mrâo hriê ngă bruă, tal dua jing đru kơ sang jưh dôk hlăm wang dua mlan hŏng mnuih mă bruă hlăm knơ̆ng bruă, mâo êdeh dŭ mdiăng nao mă bruă... hră mơar ngă pioh nao mă bruă hŏng klei khuăt ênưih, knŏng khă bi mâo kak asei, hră čih hưn klah čŭn kơ klei hdĭp mâo nao kđăm bi mklă leh snăn dưi yơh mŭt mă bruă hlăm knơ̆ng bruă”.

Tui si Nguyễn Văn Cường, k’iăng khua kiă kriê Anôk bruă hưn mthâo duah brei bruă knuă mă čar Daklak, hlăm 3 mlan akŏ thŭn, Anôk bruă anei hgŭm mkŏ mjing leh truh 26 blư̆ klei hưn mthâo duah brei bruă knuă mă ti dŭm kdriêk, wăl krah, hưn mthâo brei bruă knuă kơ 2 êbâo 223 gưl čô mnuih. Ară anei klei čiăng kơ mnuih ngă bruă mơ̆ng dŭm anôk bruă duh mkra hlăm čar lehanăn êngao čar jing lu. “Ênoh anôk duh mkra dôk čiăng kơ mnuih ngă nbruă jing prŏng, truh ti wưng anei mâo leh êbeh 2 êbâo anôk duh mkra mkŏ mjing klei hrŏng ruah mnuih ngă bruă, hlăm anăn nao mă bruă kơ êngao čar jing lu snăk dôk čiăng truh 22 êbâo čô mnuih ngă bruă. Kơ klei čiăng duah mnuih ngă bruă hlăm čar truh ti wưng anei dŭm anôk duh mkra ngă leh bruă, lehanăn mâo hrŏng ruah leh lu mnuih truh êbeh 2 êbâo čô mnuih”.

Nguyễn Quang Thuân, k’iăng khua knơ̆ng bruă mnuih ngă bruă phung knap mñai čar Daklak brei thâo, leh ksiêm dlăng, truh ti wưng anei mâo leh hlăm brô 90% ênoh mnuih ngă bruă leh sa wưng wĭt kơ ƀuôn sang dêč đuĕ kơ klei ruă tưp, ară anei lŏ wĭt mă bruă leh ti dŭm čar nah Dhŭng. Ênoh mnuih mă bruă êngiê adôk ăt hlăk mâo leh bruă sang čư̆ êa alŭ wăl lehanăn dŭm anôk bruă djŏ tuôm đru bi mguôp čiăng pral mâo bruă knuă mă. Thuân lač, hŏng klei dôk čiăng kơ mnuih ngă bruă ară anei, snăn hdră êlan duah mnuih ngă bruă truh kơ 40 êbâo čô mnuih, hlăm anăn nao mă bruă kơ ala tač êngao 1 êbâo čô mnuih hlăm thŭn 2022 jing bruă dưi ngă. “Hmei lŏ mâo klei hâo hưn lu hĭn, lehanăn ară anei lu phung duh mkra ăt mâo leh mơh klei ƀuăn srăng mkŏ mjing dŭm klei hâo hưn hlăm dŭm să. Tal dua, mnuih ngă bruă čiăng kơ bruă knuă hlăm čar ară anei mâo leh hmei ngă klei kuôl kă, lehanăn bi trông mă bruă hŏng knơ̆ng bruă Taek Wang, jing sa anôk bruă ti alŭ wăl duh mkra Hoà Phú dôk čiăng kơ mnuih ngă bruă hlăm thŭn 2022 – 2023 truh 5 êbâo čô mnuih. Hdră tal, jing hmei mđĭ hĭn klei duh bi liê čiăng kơ lu êpul êya FDI pŏk mlar klei duh bi liê ti Daklak pioh mghaih msir bruă knuă mă. Hmei bi mĭn čiăng snăk anăp truh kơ klei čŏng duah bruă mă kơ mnuih ngă bruă, hlăm anăn jing đru prăk kơ digơ̆ ngă bruă, čŏng duah bruă ngă lehanăn pŏk mlar bruă ngă đru kơ mnuih mkăn”./.