VOV4.Êđê - Hruê 26/7, Anôk gĭt gai čar Dak Lak kơ hdră tui duah, hrui mƀĭn lehanăn bi mklă anăn kahan djiê êngiă mkŏ mjing leh Klei bi kƀĭn kơ bruă tui duah, hrui ba wĭt lehanăn bi mklă anăn kahan djiê êngiă, kahan ba anăp, phung thơ̆ng kơ bruă Việt Nam djiê hlăm ênuk bi blah ti Campuchia, mâo kuai wĭt hlăm yan bhang 2021-2022. Hluê si klei hưn, leh 4 mlan pŏk ngă, êpul djŏ tuôm nao ti čar Mondulkiri (Campuchia), knuă druh êpul K51 tui duah ƀuh 15 klang klah kahan djiê êngiă ka thâo anăn, hlăm anăn mâo 1 ƀĕ giê čih kim tinh mâo anăn (“Ngọc Chút-27-9-66). Hlăm hdră ngă bruă, êpul K51 mđing răng, bi mklă mnơ̆ng mơ̆ng lĭng kahan Việt Nam mbĭt anăn mă mta sinh phẩm klang kleh jao kơ Knơ̆ng bruă Mnuih ngă bruă – kahan êka êkeh - yang ƀuôn čar Dak Lak djŏ hdră. Leh ba 15 klang kleh anei wĭt kơ lăn čar, bruă Đảng, anôk bruă sang čư̆ êa čar Dak Lak mkŏ mjing leh Knăm čang lehanăn ba dơr hlăm Wăl msat kahan djiê êngiă čar.

Ti anôk bi kƀĭn, anôk bruă sang čư̆ êa čar Dak Lak bi tŭ ư hdră kčah, mta kñăm, lŏ hluê ngă jăk boh tŭ hdră tui duah, hrui mƀĭn lehanăn bi mklă anăn kahan djiê êngiă, kahan ba anăp, phung thơ̆ng kơ bruă Việt Nam djiê hlăm ênuk bi blah ti Campuchia./.

H’ Nêč pô mblang