Thŭn 2023, hnơ̆ng ênoh gŏ êsei ƀun hlăm čar hrŏ  2,8%, hlăm anăn bruă bi hrŏ ƀun hŏng dŭm gŏ êsei mnuih djuê ƀiă tinăn jing 8,1%. Hŏng boh tŭ dưn anei, Daknông lŏ dơ̆ng ba akŏ hŏng krĭng lăn dap kngư kơ bruă bi hrŏ ƀun leh mâo yap dôk tal 2 jing čar Daklak mâo ênoh bi hrŏ ƀun truh 1,5%.

Hồ Sỹ Hải, Khua adŭ bruă đru ba bruă yang ƀuôn, hlă knơ̆ng bruă mnuih ngă bruă phung knap mñai čar Dak Nông brei thâo, yap mơ̆ng leh mkŏ mjing čar (thŭn 2004) truh ară anei, čar yap bruă bi hrŏ ƀun jing bruă ngă tal êlâo. Hŏng dŭm klei gĭr lehanăn djăp hdră mâo ba wĭt leh klei tŭ dưn năng mơak leh ksiêm wĭt hlăm 20 thŭn êgao, čar Daknông jing leh sa hlăm 10 boh čar bi hrŏ ƀun pral hĭn hlăm kluôm ala, lehanăn hlăk ba akŏ lăn dap kngư. Hnơ̆ng ênoh bi hrŏ ƀun hlăm čar hrŏ leh mơ̆ng 33,7% hlăm knhal jih thŭn 2004 truh ară anei knŏng adôk 5,2%. Tỉnh bi kčah thŭn 2024 bi hrŏ 3% gŏ êsei ƀun, lehanăn ktưn truh jih thŭn 2025 mâo bi hrŏ ƀun tui si ênoh čuăn mrâo. Čiăng dưi bi sĭt jih dŭm mta čuăn anei, mbĭt hŏng bruă ba yua dŭm hdră êlan mơ̆ng knŭk kna  Dak Nông hlăk dôk ngă lu hdră kñăm mâo klei tŭ dưn./.