VOV4.Êđê - Mrâo anei êpul ksiêm dlăng čar Dak Nông hưn mdah klei klah čŭn kơ dŭm klei ngă soh kơ bruă lăn ala ti dŭm alŭ wăl hlăm čar. Hlăm anăn, năng mđing jing bruă mkăp soh hdră kčah 65 Hră djă yua lăn kơ dŭm gŏ êsei ti să Dak Som, kdriêk Dak Glong, brei lŏ hrui mă. Khădah snăn, mnuih ƀuôn sang hdĭp mda leh anăn pla mjing hơĭt kjăp, Hră djă yua lăn ăt mâo lu gŏ êsei mgrơ̆ng čan prăk. Bruă hrui mă hră anei dôk tuôm hŏng lu klei dleh dlan.

Ayŏng Lê Minh Cà Na brei thâo, gŏ sang ñu mâo giăm 8,5 ha lăn ti alŭ 4, să Dak Som, kdriêk Dak Glŏng dưi mkăp hră djă yua lăn mŏng thŭn 2017. Gŏ sang ñu ba mgrơ̆ng čan prăk ti knơ̆ng prăk giăm 4,5 êklai prăk, kyua anăn bruă lŏ wĭt sua lăn jing dleh snăk. “Sang kâo blei lăn anei mơ̆ng thŭn 1998 lehanăn mphŭn mă bruă. Tal êlâo pla kphê, lehanăn pla ana boh kroh. Truh thŭn 2015, kâo pla alê pioh mă êbŭng. Ênoh prăk duh kơ đang war anei truh dŭm pluh êklai prăk. Mrâo anei, gŏ sang kâo hmư̆ klei hâo hưn mơ̆ng să, kdriêk srăng sua wĭt hră dưi djă yua lăn, mnơ̆ng dhơ̆ng ti lăn, kâo mĭn si dưi sua wĭt, dôk ba mgrơ̆ng ti knơ̆ng prăk leh.

Msĕ snăn, gŏ sang K’Hai mâo giăm 2,2 ha lăn pla kphê pluă hŏng tiu ti alŭ 4, să Dak Som, kdriêk Dak Glŏng, ăt dưi mkăp hră dưi yua lăn mơ̆ng thŭn 2017, nao ba mgrơ̆ng čan prăk ti knơ̆ng prăk leh. Ară anei, hmư̆ klei hưn mơ̆ng bruă sang čư̆ êa alŭ wăl kơ klei sua hră dưi yua lăn, K’Hai mđing mĭn êdi, ƀiădah kăn thâo bĭt mjing.  “Tal êlâo knuă druh bruă lăn ala să brei nao ngă hră m’ar mkăp hră dưi yua lăn. Diñu iêu jih jang gŏ sang ti Sang bi kƀĭn prŏng mơ̆ng Anôk bruă sang čư̆ êa să Dak Som čiăng ksiêm dlăng mkăp hră dưi yua lăn. Diñu êmuh krĭng kdriêl lăn, lăn pô hŏng siă knông, gŏ sang amâo mâo klei bi kuan mmiă lăn snăn kơh dưi mkăp hră dưi yua lăn. Leh mâo hră dưi yua lăn, sang kâo nao ba mgrơ̆ng ti knơ̆ng prăk čan 300 êklăk prăk, ară anei knŭk kna lač sua wĭt ti nao paih mă hră dưi yua lăn ba mdah.

Hluê si klei klah čŭn mrô 140 mơ̆ng Anôk bruă ksiêm dlăng čar Dak Nông, ti să Dak Som kdriêk Dak Glŏng mâo 65 Hră dưi yua lăn brei lŏ sua wĭt. Kyua, lăn anei mâo Anôk bruă sang čư̆ êa čar Dak Lak (hđăp) jao kơ Knơ̆ng bruă ksiêm dlăng dliê kmrơ̆ng krĭng Dhŭng kwar krah lehanăn Lăn dap kngư mơ̆ng thŭn 2003, dôk hlăm hdră čuăl mkă 3 mta dliê. Ară anei, Anôk bruă sang čư̆ êa kdriêk Dak Glŏng lehanăn să Dak Som hưn mthâo leh kơ mnuih ƀuôn sang mtă brei ba hră dưi yua lăn. Tơdah amâo ba kơ anôk bruă djŏ tuôm, kdriêk srăng lăm lui jih klei dưi ba yua mơ̆ng dŭm mta hră m’ar anei. Khă snăn, hlăm 65 pŏk hră dưi yua lăn mkăp soh anei, lu mâo mnuih ƀuôn sang nao mgrơ̆ng čan prăk. Kyua anăn, Nguyễn Hồ Hữu – K’iăng khua knơ̆ng prăk knŭk kna ti čar Dak Nông brei thâo: Dŭm anôk bruă djŏ tuôm čar Dak Nông brei bi mklă mnuih tŭ klei đua klam tơdah mkăp lăn soh čhuai. “Tơdah mnuih ƀuôn sang tla ênŭm dŭm prăk čan lehanăn prăk mnga snăn kơh knơ̆ng prăk lŏ tla wĭt hră dưi yua lăn amâo dah ngăn drăp bi hrô. Klei anei brei hluê ngă djŏ hdră kčah hlăm Asăp mtrŭn 39. Dŭm knơ̆ng prăk diñu brei čan ngă djŏ leh, amâo soh ôh. Bi klei mkăp hră dưi yua lăn doh lehkơnăn nao ba mgrơ̆ng čan prăk, klei anei bruă sang čư̆ êa alŭ wăl brei msir mghaih phung ngă soh, bruă msir ruh mtlaih anei si srăng ng snăn êdei anei anôk bruă djŏ tuôm brei dôk bi trông hluê si klei kčah mtrŭn mơ̆ng Hdră bhiăn lăn ala lehanăn klei kčah mtrŭn mơ̆ng knơ̆ng prăk.

Boh sĭt klei klah čŭn mơ̆ng Anôk bruă ksiêm dlăng čar Dak Nông, Anôk bruă sang čư̆ êa kdriêk Dak Glŏng ba mdah leh hră mtrŭn hưn mthâo klei lŏ sua wĭt hră dưi yua lăn mơ̆ng 65 pŏk hră dưi yua lăn kyua mkăp soh čhuai ti să Dak Som. Khă snăn, truh ară anei, bruă sua wĭt dôk tuôm hŏng lu klei dleh dlan, kyua păt čiăng jih hră dưi yua lăn dôk ba mgrơ̆ng čan prăk. Lê Văn Đại – Khua anôk bru sang čư̆ êa să brei thâo:“Hmei hưn mthâo lehanăn mƀlir ti anôk bruă sang čư̆ êa să, dŭm krĭng mnuih ƀuôn sang dôk lehanăn hưn mthâo ti loa kčaĭ asăp čiăng mtrŭt mjhar mnuih ƀuôn sang thâo tơdah knŭk kna mkăp soh čhuai snăn srăng sua wĭt. Ƀiădah klei dleh dlan tinei jing lu mnuih ƀuôn sang ba nao mgrơ̆ng čan prăk ti knơ̆ng prăk leh.

Trần Nam Thuần – Khua anôk bruă sang čư̆ êa kdriêk Dak Glŏng brei thâo: Hlăm 65 pŏk hră dưi yua lăn kyua mkăp soh čhuai, ñu pô bi mmklă mkăp leh 45 pŏk hră. Khă snăn, bruă sua wĭt dôk tuôm hŏng lu klei dleh dlan:“Kâo ăt jao kơ să čiăng diñu m’ĭt klei hưn mthâo lehanăn mă bruă hŏng dŭm gŏ sang, mtô mblang mtrŭt mjhar mnuih ƀuôn sang lŏ jao wĭt hră dưi yua lăn mkăp soh. Hmư̆ ayŏng adei hưn wĭt ăt hrui mâo 60/64 pŏk hră leh. Khă snăn, kâo mkŏ mjing klei bi kƀĭn ksiêm dlăng êlâo kơh srăng hưn mthâo klă klơ̆ng. dlăng kluôm, bruă sua wĭt jing dleh dlan. Ară anei knŏng mđĭ hdră mtô mblang, mtrŭt mjhar čiăng mnuih ƀuôn sang jao wĭt, amâo lŏ mâo hdră mkăn ôh.

Djŏ tuôm kơ bruă mkăp soh 65 pŏk hră dưi yua lăn ti să Dak Som lehanăn lu klei soh čhuai mkăp hlăm bruă lăn ala ti kdriêk Dak Glŏng, Ngô Thanh Danh, Khua bruă Đảng čar Dak Nông brei thâo, hlăm wưng ti anăp čar srăng msir mghaih jih phung ngă soh./.

H’Nêč pô mblang