VOV4.Êđê - Mrâo anei, bruă sang čư êa čar Dak Nông mkŏ mjing leh klei kƀĭn ksiêm êmuh “Mđĭ kyar bruă duh mkra, ala ƀuôn čar Dak Nông” hluê êlan klă anăp leh anăn online hŏng phung kreh knhâo, phung thơ̆ng kơ bruă mơ̆ng anôk bruă ksiêm duah Êgar Ngŏ.

Êlâo kơ bi trông, phung bi ala nao ksiêm dlăng leh klei mâo sĭt ti dŭm anôk hlăm Wăl anôk ƀăng k’ưp čư̆ pui tar rŏng lăn UNESCO Dak Nông, gru hmô bruă duh mkra ti alŭ wăl, ksiêm dlăng hră m’ar čuăl mkă mđĭ kyar bruă duh mkra ala ƀuôn mơ̆ng čar. Ti êlan nao mŭt phă Dhŭng mơ̆ng lăn dap kngư mkŏ hŏng krĭng Ngŏ kwar Dhŭng, čar Dak Nông mâo ƀăng bôxit hŏng hnơ̆ng lu êdi tar rŏng lăn, jing alŭ wăl ba akŏ hlăm kluôm ala kơ klei găl mđĭ kyar bruă pui kmlă êran hŏng pil yang hruê, êran hŏng ai angĭn. Mâo êbeh 380 êbâo ha lăn, lu jing lăn hrah bazan, mâo djăp êa jua krông hnoh, djŏ guôp hŏng lu mta mnơ̆ng pla sui thŭn, ana boh kroh, mđĭ kyar bruă rông mnơ̆ng hŏng hnơ̆ng prŏng. Lu anôk lăn mnga êa m’ak, wăl kmrơ̆ng hrông mơ̆ng hđăp boh nik wăl anôk ƀăng k’ưp dlông hĭn êdi ti krĭng Ngŏ Dhŭng Asi, hŏng lu êpul êya mnuih djuê ƀiă dôk djă pioh knhuah dhar kreh jăk siam.

Phung thơ̆ng kơ bruă lač snei, Dak Nông mâo dŭm klei găl kơ lăn ala, yan adiê, jing krĭng lăn dưi mđĭ kyar kjăp. Klei gun kpăk hlăm hdră mđĭ kyar ară anei anăn jing anôk bruă êlan klông êdu kƀah, bruă duh mkra hliê hluôt, bruă ngă lŏ hma hluê si klei bhiăn êlâo, mnuih mă bruă dôk kƀah. Čiăng hluê ngă bi sĭt klei čang hmăng ba Dak Nông đĭ kyar hĭn, Nai prŏng, nai prĭn Trình Quang Phú – Khua knơ̆ng ksiêm hriăm, Khua êpul hgŭm bruă kreh knhâo hlăm knơ̆ng ksiêm duah lehanăn mđĭ kyar êgar Ngŏ lač klă, mbĭt hŏng bruă ruh mtlaih dŭm klei gun kpăk, Dak Nông brei mđĭ klei hưn mthâo klei jing mơ̆ng pô truh hŏng kluôm ala lehanăn tar rŏng lăn, hluê hŏng dŭm klei čih, phim rup...Hlăm kluôm hdră anei snăn kâo čang hmăng kơ diih mđing kơ bruă hưn mthâo, kyua bruă anei dôk ngă ƀiă đei. Dưi lač, êlâo kơ hmei hriê tinei, hmei brei jih ayŏng adei hlăm adŭ bruă pŏk web dlăng jih mâo ya klei hâo hưn, ƀiădah amâo mâo ôh, ƀiă snăk.

Nai prĭn Trần Du Lịch, pô thơ̆ng kơ bruă duh mkra, K’iăng khua êpul bi ala anôk bruă kƀĭn ala hđăp mơ̆ng ƀuôn prŏng Hồ Chí Minh, lač snei, hŏng dŭm klei găl mâo, Dak Nông klă sĭt srăng dưi kpưn đĭ tơdah mâo klei bhiăn jak iêu hdră duh bi liê.Brei bi êdah klă klei čang hmăng đĭ kyar mơ̆ng Dak Nông hluê hŏng klei gĭr jak iêu hdră duh bi liê hlăm lehanăn êngao ala čar mjing sa hdră duh bi liê mrâo hlăm jih jang anôk bruă. Diih brei dưi jak iêu phung duh bi liê prŏng hlăm grăp anôk bruă, mjing klei găl; amâo djŏ drei knŏng mkŏ mjing klei bi kƀĭn mâo djăp ênŭm phung bi liê nao bi klă tinăn knŏng čiăng PR mă đuič amâo mâo mnuih mă bruă ôh. Tal dua, brei drei mđĭ hĭn klei thâo jak iêu hdră duh bi liê, kyua PCI mơ̆ng Dak Nông ƀiă đei, kơ anôk mă bruă si srăng ngă brei diih – jing phung khua kiă kriê brei hưn mthâo klei čang hmăng nđĭ kyar Dak Nông kơ mnuih ƀuôn sang lehanăn anôk bruă kđi čar thâo. Brei drei klă mngač hlăm hdră čuăl mkă, dŭm hdră mtrŭn duh bi liê, hdră mtrŭn brei klei jăk găl... brei mjing klei đăo knang kơ anôk bruă duh mkra lehanăn mnuih ƀuôn sang. Boh nik hŏng mnuih ƀuôn sang brei dưi bi mklă hdră anăn si srăng đĭ kyar, ya klei tŭ dưn kơ mnuih ƀuôn sang tinăn, mơ̆ng anăn srăng mjing klei sa ai hlăm mnuih ƀuôn sang, boh nik hlăm bruă hiu čhưn ênguê.

Klei bi kƀĭn trông đru kčĕ klei blŭ mơ̆ng phung thơ̆ng kơ bruă mrô sa mơ̆ng ala čar hlăm bruă duh mkra, bruă mtô bi hriăm, bruă kreh knhâo, kdrăp mrâo brei ƀuh klei gĭr mơ̆ng anôk bruă Đảng, bruă sang čư̆ êa čar Dak Nông hlăm bruă tui duah êlan nao ba kơ čar gĭr ktưn kpưn đĭ, bi sĭt mta kñăm mâo Hdră mtrŭn Klei bi kƀĭn bruă Đảng čar Dak Nông tal XII, wưng thŭn 2020 – 2025 kčah leh, gĭr ktưn jing čar mâo hnơ̆ng hrui wĭt man dưn hlăm thŭn 2025 lehanăn čar đĭ kyar ƀiă hlăm thŭn 2030 hlăm krĭng Lăn dap kngư./.