VOV4.Êđê - Anôk bruă pui kmlă Dak Nông dôk pŏk ngă hdră bruă pui kmlă krĭng ƀuôn sang, gĭr jih jang să mâo djăp hnơ̆ng čuăn mrô 4 kơ klei pui kmlă krĭng ƀuôn sang lehanăn 100% ênoh gŏ êsei dưi ba yua pui kmlă êđăp ênang. Thŭn 2022, pui kmlă Dak Nông kriê dlăng, duh bi liê 53 hdră bruă, 22 hdră mkra mđĭ hŏng ênoh prăk êbeh 150 êklai prăk.

Mbĭt hŏng hdră duh kơ bruă pui kmlă, anôk bruă ăt mđĭ hdră ksiêm dlăng êlan pui kmlă đŭt krĭng ƀuôn sang mơ̆ng dŭm êpul bruă ti alŭ wăl. Êpul tŭ ksiêmdlăng 6 êpul hgŭm bruă pui kmlă hŏng êbeh 120 km êlan pui kmlă, 6 anôk mđĭ mtrŭn pui kmlă, mkra mđĭ hnơ̆ng tŭ jăk hlăm bruă mkăp pui kmlă kơ êbeh 17.000 gŏ êsei. Khădah jing krĭng êlan dleh dlan, truh ară anei, jih alŭ, ƀuôn ti Dak Nông mâo leh pui kmlă yua hlăm klei hdĭp aguah tlam lehanăn ngă bruă duh mkra pla mjing, ênoh gŏ êsei ba yua pui kmlă êbeh 99%. Mbĭt hŏng hdră duh bi liê, mkra mđĭ êlan pui kmlă, anôk bruă pui kmlă Dak Nông ăt mđĭng mđĭ hnơ̆ng tŭ jăk, bi khuăt klei ngă hră m’ar, mtrŭt mđĭ bruă ba yua kdrăp hâo hưn ênuk mrâo čiăng mkăp klei ngă bruă jăk hĭn kơ mnuih ƀuôn sang./.

Y-Khem pô mblang