Trần Đình Hiệp, Khua Knŏng bruă ngă dŏ leh anăn wăl hdĭp mda čar Dak Nông brei thâo, klei klưh hroh hang êa Krông Knô mâo leh hlăm lu thŭn anei, bon nik leh mâo dŭm hdră bruă phŭn pui kmlă msĕ si Phŭn pui kmlă Buôn Tua Srah leh anăn phŭn pui kmlă Chư Pông Krông. Hiệp ăt bi mklă klei klưh hroh hang êa Krông Knô mâo mta phŭn kyua klei mă čuah mơ̆ng dŭm anôk bruă duh mkra mơ̆ng jih dua čar Dak Lak leh anăn Dak Nông mkăp brei. Êa krông Krông Knô ƀrư̆ hruê ƀrư̆ klưh hroh leh anăn lar. Hlue si Hiệp, kyua amâo dưi bi mklă ôh bruă klam klă klơ̆ng mơ̆ng dŭm anôk bruă djŏ tuôm anăn bruă msir mgaih bruă klam leh anăn tla hnô kơ mnuih ƀuôn sang dôk tuôm hŏng lu klei dleh dlan.

 “Kyua mta phŭn mă čuah leh anăn phŭn pui kmlă kyua anăn phŭn pui kmlă - pô duh bi liê phŭn jing Buôn Tua Srah amâo sa anăn hnơ̆ng tla hnô ƀoădah brei čar ngă bruă kơ dŭm anôk bruă mă čuah djŏ tuôm kơ dua tĭng bi hgŭm tla hnô kơ mnuih ƀuôn sang. Ară anei dleh jing bruă klưh hroh snăn ƀiădah ksiêm dlăng hnơ̆ng hmăi, mâo lu kdrêč êtuh mơ̆ng pô bi liê dleh dlan snăk, phŭn pui kmlă dŭm kdrêč êtuh, bruă mă čuah dŭm kdrêč êtuh snăn ka dưi ksiêm dlăng ôh.”

Hlue si Trần Văn Khánh, Khua Knơ̆ng bruă phŭn pui kmlă Ƀuôn Kuôp, klei klưh hroh hang êa Krông Knô dưi bi mklă kyua lu mta phŭn msĕ si lăn ala, bi mlih yan adiê, mă čuah leh anăn ba yua phŭn pui kmlă. Hlăm anăn, mta phŭn ba yua phŭn pui kmlă mâo bruă klam mơ̆ng Knơ̆ng bruă pui kmlă Ƀuôn Kuôp. Khădah snăn, mơ̆ng thŭn 2018 truh ară anei, hnơ̆ng klưh hroh hang êa Krông Knô pral đei leh anăn hmăi prŏng snăk mơ̆ng bruă mă čuah. Tĭng knơ̆ng bruă phŭn pui kmlă srăng tla kơ mnuih ƀuôn sang, ƀiădah hŏng klei čiăng bruă sang čư̆ êa alŭ wăl brei ksiêm dlăng, mbha klă bruă klam mơ̆ng jih jang anôk bruă duh mkra djŏ tuôm.

Ăt hlue si Khánh, ti dŭm kdrêč klưh hroh lăn, Knơ̆ng bruă phŭn pui kmlă Ƀuôn Kuôp mâo bruă klam tla hnô. Êlâo dih, dŭm ênhă lăn mkra mjing mơ̆ng mnuih ƀuôn sang klưh hroh lăn, bruă sang čư̆ êa alŭ wăl bi mklă hdră msir, knơ̆ng bruă mâo tur knơ̆ng čiăng bi liê prăk tla hnô. Ƀiădah dŭm thŭn giăm anei, bruă sang čư̆ êa mtă kơ knơ̆ng bruă brei kuôl kă hŏng mnuih ƀuôn sang hlăm bruă tla hnô:

 “Ară anei mâo bruă, hdră ngă msĕ si êlâo dih snăn bruă sang čư̆ êa alŭ wăl lač, kyua klei kčah mtrŭn hdră bhiăn, bruă sang čư̆ êa amâo dưi bi mklă hdră tla hnô ôh ƀiădah mtă kơ Knơ̆ng bruă phŭn pui kmlă Ƀuôn Kuôp kuôl kă hŏng mnuih ƀuôn sang kơ prăk tla hnô, đru kơ ênhă klưh hroh. Hdră msir tla hnô, đru brei mâo anôk bruă kriê dlăng knŭk kna bi mklă snăn knơ̆ng bruă dưi mâo prăk. Hră mơar mơĭt kơ alŭ wăl, leh anăn kƀĭn ƀiădah ka dưi ruh mghaih.”

 Trần Đăng Ánh, K’iăng Khua Knơ̆ng bruă sang čư̆ êa kdriêk Krông Knô, čar Dak Nông brei thâo, bruă tla hnô kơ klei luč liê klưh hroh lăn mkra mjing wăl êa krông Knông wưng êgao kyua 2 phung ngă jing dŭm knơ̆ng bruă mă čuah leh anăn knơ̆ng bruă pui kmlă hlue ngă. Dŭm kdrêč klưh hroh lăn hlăm klei mă čuah dưi brei snăn dŭm knơ̆ng bruă čuah čŏng kuôl kă tla hnô kơ mnuih ƀuôn sang. Dŭm kdrêc klưh hroh êngao kơ dưi brei hră kơ dŭm anôk bruă mă čuah snăn Knơ̆ng bruă pui kmlă Ƀuôn Kuôp đua klam tla hnô.

Êlâo dih, Knơ̆ng bruă sang čư̆ êa kdriêk bi mklă hdră msir tla hnô ênhă klưh hroh lăn. Biădah tơdah ksiêm dlăng Hdră bhiăn lăn ala 2013 snăn amâo kčah ôh bruă sang čư̆ êa kdriêk hrui mă lăn, tla hnô đru kyua bruă ngă mơ̆ng sang mkra mjing pui kmlă ngă. Kyua anăn, kdriêk mâo leh hdră bi hgŭm, đru knơ̆ng bruă pui kmlă hlue nga djăp ênŭm hdră tla hnô msĕ si êlâo dih, knŏng ti kdrêč knhal tuč jing knơ̆ng bruă bi mklă hdră msir tla hnô. Khădah snăn, tĭng Knơ̆ng bruă phŭn pui kmlă Ƀuôn Kuôp ăt ka tŭ ư, ngă mâo klei gun kpăk sui:

 “Kdriêk ăt mă leh bruă hŏng Knơ̆ng bruă Ƀuôn Kuôp lu blư̆. Kdriêk gĭt gai adŭ bruă ngă dŏ bi mklă sa hdră msir mâo wăt klei hưn mthâo bi mklă, mơĭt kơ knơ̆ng bruă. Knơ̆ng bruă dlăng mơ̆ng anăn čiăng siñê ƀiădah knơ̆ng bruă lŏ akâo bi mklă snăn klei gun kpăk tinei. Ară anei knŏng ruh mgaoh klei anei đuč: bi mklă hdră msir gưl kdriêk amâodah pô duh bi liê - anôk bruă ngă klei tla hnô. Čang hmăng Knơ̆ng bruă Ƀuôn Kuôp bi hgŭm kjăp hĭn, boh nik akâo kơ klei bhiăn gưl dlông čiăng mâo hdră msir.”

Mrâo anei, Khua knơ̆ng bruă sang čư̆ êa čar Dak Nông gĭt gai Knơ̆ng bruă ngăn dŏ leh anăn wăl hdĭp mda mkŏ mjing êpul ktuê dlăng, bi hgŭm hŏng čar Dak Lak bi mklă mta phŭn klưh hroh hnag krông Knô leh anăn bruă klam dŭm tĭng djŏ tuôm čiăng hlue ngă tla kơ klei mnuih ƀuôn sang luč liê. Mbĭt anăn, dŭm anôk bruă djŏ tuôm mơ̆ng čar brei ngă jăk hdră kčah hlăm Hdră mtrŭn mrô 23 mơ̆ng Knŭk kna kơ klei kriê dlăng čuah, boh tâo hlăm êa krông leh anăn răng mgang êa krông, hang krông./.