VOV4.Êđê - Hluê si Knơ̆ng bruă mnuih mă bruă – kahan êka êkeh lehanăn yang ƀuôn čar Dak Nông, ƀri wưng Têt djuê ana Nhâm Dần 2022, kluôm čar Dak Nông mkŏ mjing leh dŭm êpul nao čuă êmuh, mđup brei êbeh 73.000 hnư mnơ̆ng kơ dŭm êpul bruă, mnuih êdah kdlưn, gŏ sang knŭk kna dlăng ba, mnuih mâo bruă tŭ dưn hŏng cách mạng. Ênoh prăk duh kơ bruă anei êbeh 33 êklai prăk mă mơ̆ng ngăn prăk knŭk kna, hlăm anăn grăp hnư mâo ênoh mơ̆ng 300.000 - 1 êklăk prăk, tui hluê mdê bi pô. Klă klơ̆ng, mnuih dưi tŭ mă mnơ̆ng Têt djuê ana gưl anei mâo: Mnuih mâo bruă tŭ dưn hŏng cách mạng, găp djuê phung kahan djiê êngiă, gŏ êsei ƀun jing mnuih ƀuôn sang djuê ƀiă, mnuih dôk tŭ klei đru mơ̆ng yang ƀuôn, knuă druhmdei bruă, gŏ sang mâo anak čô dôk mă bruă ti Trường Sa, Sang pra DK1; ƀuôn sang mnuih djuê ƀiă. Y Long – K’iăng khua Knơ̆ng bruă mnuih mă bruă – kahan êka êkeh lehanăn yang ƀuôn čar Dak Nông brei thâo: “Đảng, Knŭk kna kreh mđing dlăng nanao čiăng kơ mnuih ƀuôn sang trei mđao, djăp ênŭm hĭn. Si tô hmô, hlăm wưng têt anei, čar Dak Nông mđup brei kơ grăp boh ƀuôn 10 êklăk prăk čiăng kơ mnuih ƀuôn sang ƀơ̆ng Têt. Êlâo adih, kreh kƀah mnuih dưi tŭ klei đru ƀiădah hlăm thŭn anei jao kơ să ksiêm dlăng grăp gŏ êsei. Êdei anăn, hluê hŏng bruă mặt trận, êpul gru bi kal hrah kdriêk čiăng lŏ ksiêm dlăng dŭm gŏ êsei ƀun dlăng si ngă djŏ leh. Tơdah dôk kƀah lŏ jao kơ alŭ, ƀuôn ksiêm dlăng, amâo lui kƀah hlei gŏ êsei ôh./.

H’Nêč pô mblang