Hlăm dŭm hruê êgao, dŭm anôk bruă mơ̆ng alŭ wăl dôk mjêč msir mgaih klei klưh hroh lăn kjham taluy êlan Hồ Chí Minh ti Km1936+ 080 leh anăn Km1936+300  ti alŭ 3, să Quảng Tín, kdriêk Dak Rlâp.

Dua anôk anei klưh taluy nah gŭ leh anăn hroh ti anôk dap, huĭ srăng ngă jhat kơ êlan klông leh anăn luč êđăp ênang hlăm êlan klông. Ti dua anôk anei, anôk bruă kriê dlăng ktuê êlan Hồ Chí Minh dôk lŏ mkra anôk kđang ti êlan mđoh êa kñăm mkhư̆ hmăi kơ êlan klông. Mbĭt anăn, bi hgŭm hŏng bruă sang čư̆ êa alŭ wăl hli lăn dơr, lŏ mkra êlan kñăm bi hrŏ klei huĭ hyưt, pơ̆ng mdhă hưn brei răng, dhiang klei kwang dar anôk klưh hroh, anôk kđang.