. Klei bi kƀĭn ksiêm wĭt kơ thŭn 2025 jing sa thŭn boh hŏng klei lông dlăng, êjai hnơ̆ng đĭ kyar kluôm (GRDP) hlăm čar dưi djăp 6,68%, jing amâo mâo djăp ôh hŏng ênoh kruak hlăm 8% tui si mtrŭn. Kyua klei bi liê ngăn prăk duh kơ bruă kluôm êmưt, knŏng mil 43% hdră kčah, ksiêm wĭt klei duh bi liê hlăm kluôm yang ƀuôn knŏng djăp 82,5%. Mbĭt hŏng anăn čar lŏ tuôm klei luič liê prŏng kyua yan adiê ngă hlăm knhal jih thŭn. Khădah amâo mâo djăp ôh hŏng ênoh kčah čuăn, ƀiădah thŭn  2025 ti Daklak ăt ƀuh klei đĭ kyar jăk. Mkă hŏng thŭn 2024, mâo ba wĭt ngăn prăk kơ knŭk kna truh 16.490 êklai prăk, đĭ 17%, ênoh prăk mâo ba wĭt mơ̆ng bruă bi mnia mblei hŏng ala tač êngao 2,8 êklai USD, đĭ 26%. Mơ̆ng klei hlak mblang anăn, anôk bruă kiă kriê bruă Đảng čar bi tŭ ư leh hŏng hdră mđĭ kyar kluôm GRDP thŭn 2026 jing 10% (ênoh đĭ kyar dua mrô), bi êdah klei gĭr prŏng mơ̆ng bruă kđi čar, kñăm lŏ kơrŭ wĭt bruă duh mkra leh klei yan adiê ngă.

Hlăm hdră êlan anăn, alŭ wăl duh mkra lŏ dơ̆ng bi mklă ai ktang bruă duh mkra, kñăm mâo klei đĭ kyar êbeh 19%; bruă dliê kyâo, bruă kan hdang đĭ êbeh 5%; klei bi mnia mblei đĭ 9,5%. Lương Nguyễn Minh Triết, Khua bruă Đảng čar Daklak mtă kơ dŭm knơ̆ng dhar bruă, alŭ wăl hlăm čar bi mklă hdră êlan mđĭ kyar mrâo, bi djŏ hŏng grăp alŭ wăl, bi kơrŭ wĭt bruă knuă leh klei yan adiê ngă,đĭ kyar bruă nah gŭ, bruă pui kmlă êlan klông, anôk mkra mjing, lehanăn bruă hiu čhưn ênguê čiăng bi mâo ênoh đĭ kyar hlăm dua mrô.

“Tal êlâo jing mđing mđĭ ênoh mâo ba wĭt, hyuă kjăp bruă bi mlih mrô, mjing klei găl kơ mnuih ƀuôn sang tuh jia, tal dua mâo hdră kjăp iêo jak klei duh bi liê mđrăm mbĭt hŏng yang ƀuôn mă bruă, dưi yua jih klei găl kơ klei duh bi liê, ruh mgaih jih djăp mta klei gun kpăk, čiăng dưi bi leh jăk bruă čuăl mkă, boh bik klei čuăl mkă čar.”