Ti anôk bi kƀĭn, bi ala bruă kƀĭn ala čar Dak Lak hưn leh kơ mnuih ƀuôn sang dŭm boh tŭ mơ̆ng klei bi kbĭn, mñă mâo lu hdră bhiăn, hdră mtrŭn brei bi mklă, djŏ tuôm kơ hdră mđĭ kyar bruă duh mkra – ala ƀuôn, bruă ngăn prăk, hdră knuă druh lehanăn lu bruă djŏ tuôm kơ klei hdĭp mnuih ƀuôn sang. Mnuih ƀuôn sang Dak Lak bi êdah klei sa ai hŏng boh tŭ mâo bruă kƀĭn ala dưi mâo, mbĭt anăn hưn mdah dŭm klei akâo čiăng kñăm bi leh hdră mtrŭn lehanăn msir mghaih klei mâo ti alŭ wăl.

Bruă mâo lu phung bi ala Dak Lak mđing uêñ jing klei hbâo pruê, mjeh mnơ̆ng pla, mnơ̆ng rông amâo tŭ jăk dưi hưn mdah hlăm hla pŏk ala ƀuôn. Mnuih ƀuôn sang čang hmăng anôk bruă djŏ tuôm ksiêk kjăp wăl anôk mnia mblei mnơ̆ng lŏ hma, ƀư̆ mkra hdră hâo mdah amâo djŏ anei lehanăn msir mghaih ktang klei ngă soh. Trần Hoàng Diễm Phúc, ƀuôn hgŭm Ƀuôn Ama Thuôt, čar Dak Lak brei thâo:

“Hbâo pruê, ana mjeh, mnơ̆ng pla dưi hưn mthâo mâo kdrăp klei thâo anak mnuih mkra jăk dlăng, snăn mnuih ƀuôn sang ênưih đăo knang. Kâo akâo brei mđĭ hdră ksiêm dlăng hnơ̆ng tŭ jăk klei hâo hưn, hâo mdah kñăm rơ̆ng klei djŏ klă, đru kơ mnuih ƀuôn sang ruah djŏ”.

Mbĭt hŏng anăn, bruă mâo mnuih ƀuôn sang Dak Lak bơ̆k bâo lu, jing klei knơ̆ng mbông êa jhat rai mơ̆ng klei êa lip êgao. Akâo kơ čar pral ksiêm dlăng hnơ̆ng luič liê, ba êpul hriê mkra dŭm hdră hmăi djŏ./.