VOV4.Êđê - Ti sang hră gưl prŏng Lăn dap kngư, ƀuôn prŏng Ƀuôn Ama Thuôt, čar Dak Lak mkŏ mjing leh knăm myơr êrah Knăm kjuh Hrah tal 14 thŭn 2022. Khădah dôk hlăm wưng bluh mâo klei ruă tưp, dŭm êtuh čô sinh viên hlăm sang hră ăt nao myơr êrah. Hŏng asăp hưn mthâo “Myơr êrah dŏng hdĭp mnuih – Klei hdĭp kâo lehanăn ih, hdră myơr êrah Knăm kjuh Hrah tal 14 thŭn anei ti Sang hră gưl prŏng Lăn dap kngư jăk iêu lu mnuih nao hgŭm.

Hlăm hdră anei, anôk mkŏ mjing tŭ mă leh 606 mrô êrah doh. Sang hră gưl prŏng Lăn dap kngư jing anôk knhal tuič srăng mjưh ruê̆ hdră knăm kjuh hrah ti Dak Lak thŭn anei. Giăm 1 mlan mkra leh êgao, hdră knăm kjuh hrah ti Dak Lak thŭn anei mâo giăm 3.500 mrô êrah doh, ba kơ dŭm sang êa drao kăp dŏng mdrao mnuih ruă./.

H’Nêč pô mblang