VOV4.Êđê - Hlăm klei mdrơ̆ng hŏng Covid-19 ti Dak Lak, hŏng klei gĭr ktưn mơ̆ng phung aê mdrao lŏ mâo klei đru mguôp mơ̆ng phung đaŏ. Jih 4 mlan êgao, diñu nao leh ti Sang êa drao jing jai leh anăn wăl mdrao mgŭn mnuih ruă Covid-19 kjham ti sang êa drao prŏng krĭng Lăn Dap Kngư čiăng đru kơ phung aê mdrao mđĭ ai, kriê dlăng phung F0 hgao klei ruă tưp.

Dôk bi mdoh asei mlei kơ mnuih ruă Covid 19 ti anôk mdrao mnuih ruă kjham ti sang êa drao prŏng Krĭng Lăn Dap Kngư jing bruă ngă hlăm grăp hrue mơ̆ng êpul bi đru kbiă hriê mơ̆ng Sơr Hoà Bình, ti ƀuôn prŏng Ƀuôn Ama Thuôt, čar Daklak hlăm dăl mlan 4 leh êgao. Sơr Nguyễn Thị Thanh Thuyền brei thâo, mbĭt hŏng bruă duh kơ klei huă ƀơ̆ng, thiăm mbŏ mnơ̆ng ƀơ̆ng tŭ jăk, đru mnuih ruă bi mdoh asei mlei... Phung ba anăp nao hlăm klei bi đru kreh bi juh, mđĭ ai mnuih ruă: “Ƀuh bruă anei jing yuôm bhăn, lehanăn mơak mơh, khădah čŭt hơô kdrăm răng mgang jing êmăn snăk, ƀiădah jing pô ngă klei anei kyua mnuih ruă, snăn pô hơĭt ai tiê mơh. Digơ̆ hriê kơ anei jing hjăn păn amâo mâo pô dlăng ba, digơ̆ djiê hjăn mơh anăn yơh jing klei lu mnuih dôk bi mĭn, ƀiădah mâo leh pô dôk mbĭt pô nao mđĭ ai, bi juh, đru ba, dlăng kriê snăn digơ̆ dơ̆ng mâo klei mơak, kyuadah ăt adôk mâo mnuih mđing kơ digơ̆. Phung Sơr mă bruă dlăng msĕ si mnuih hlăm sang pô yơh, mă bruă hŏng klei mơak, amâo mâo klei ktrŏ ôh”.

Bi hŏng Sơr Lê Thị Thịnh, hlăm dŭm hrue mă bruă ti anôk mdrao klei ruă tưp Covid 19 đru leh kơ phung ba anăp dưi thâo kral klei suaih êmăn, klei amâo mâo hơĭt kơ ai tiê klei mĭn mnuih ruă, anăn jing klei sĭt. Bruă ba wĭt klei mơak, klei êđăp ênang kơ mnuih hlăk dôk bi čĭk hŏng klei ruă, klă sĭt jing yuôm bhăn êdi hŏng phung ngă bruă bi đru: “Jing yuôm bhăn êdi, kyuadah pô mâo đru lu mnuih amâo mâo myun, lehanăn digơ̆ čiăng snăk kơ pô nao đru. Kâo ƀuh anei jing phung ayŏng adei pô, lehanăn digơ̆ rŭng răng, dleh dlan hĭn kơ pô, êjai pô dôk mâo klei suaih pral, snăn đru yơh kơ jih jang digơ̆, hŏng ya mta bruă pô dưi ngă”.

Mbĭt hŏng klei mdrao mgŭn hŏng jih ai tiê mơ̆ng phung nai aê mdrao, klei đru ba jih ai tiê mơ̆ng phung ba anăp đru leh kơ phung djŏ klei ruă tưp Covid 19, lehanăn mnuih hlăm sang digơ̆ hơĭt ai tiê mơh. Nguyễn Xuân Tưởng, ti să Êa Nam, kdriêk Êa H’Leo brei thâo, 10 hrue dôk kiă ti jhưng ama ruă, ƀuh jih si klei phung Sơr mă bruă, ñu mgei ai tiê. Phung Sơr ngă brei jih bruă mơ̆ng găp djuê digơ̆, jih ai tiê dlăng kriê, lehanăn mđĭ ai digơ̆: “Ti anei phung Sơr hriê đru bi mdoh asei mlei mnuih ruă, lehanăn plah hnun, djăp mta, jing đru bi mdoh brei hŏng jih jang mnuih ruă”.

Tui si Aê mdrao Nguyễn Văn Tính, ti anôk bruă mdrao mjêč, mâo klei đru ba mơ̆ng phung ba anăp, jing yuôm bhăn snăk, đru kơ mnuih ruă bi hrŏ klei ktrŏ kơ mnuih ngă bruă. Phung ba anăp hlăk dôk klam sa kdrêč đru bruă phung nai mdrao, ti dŭm anôk mdrơ̆ng hŏng klei ruă tưp Covid 19, đru kơ bruă mdrao mgŭn ngă jăk hĭn bruă mdrao mgŭn. Aê mdrao Nguyễn Văn Tính lač, êngao kơ klei mdrao hŏng êa drao gŭn, snăn mâo klei mđĭ ai hŏng klei khăp, anăn yơh jing bruă yuôm bhăn hŏng mnuih ruă Covid 19: “Mduh hĕ êdi mơh. Tal sa phung Sơr duh mĭn kơ mnuih ruă dơ̆ng mơ̆ng klei huă ƀơ̆ng, hlŏng kơ bruă bi mdoh asei mlei, lehanăn mđĭ ai mnuih ruă. Klei kơ ai tiê mnuih ruă jing yuôm bhăn snăk, arăng dlăng hlăm tivi ƀuh mnuih djiê lu đei, snăn duah bi mĭn yơh hbĭl klei anăn truh hŏng pô, snăn diñu bi huĭ sơăi, snăn mâo phung Sơr nao mđĭ ai digơ̆”.

Hlăm klei gĭr čiăng brưih dưi hŏng klei ruă mơ̆ng mnuih mâo klei ruă tưp Covid 19 ti sang êa drao prŏng krĭng Lăn Dap Kngư, mđrăm mbĭt hŏng phung nai aê mdrao, lŏ mâo klei bi kah mbha ai tiê klei khăp mơ̆ng phung Sơr. Klei khăp anăn đru leh sĭt hŏng lu mnuih ruă Covid 19.

Êlâo anăn, êjai klei ruă tưp Covid 19 hlăk dleh dưi ksiêm dlăng, lehanăn bŏ hŏng klei huĭ hyưt, phung đăo kơ Aê Diê ti Daklak, mâo leh lu bruă ngă hlăm klei bi đru, đru kơ găp djuê mnuih ruă. Khua Pô Mtô Lemous Philemon, Khua Anôk bruă bi ala klei đăo Mrâo Mrang Jăk čar Daklak brei thâo: Êngao kơ jih jang mnơ̆ng đru dŏng kơ phung ƀuôn sang hlăm krĭng mâo klei ruă tưp, Anôk bruă bi ala klei Đăo Mrâo Mrang Jăk čar Daklak ăt mđup brei leh mnơ̆ng Êpul bi đru bruă mdrao mgŭn Sang Aê Diê Klei Mrâo Mrang Jăk Kwar Dhŭng Việt Nam đru kơ dŭm gŏ sang phung đăo jing F0; F1 ti Daklak msĕ si braih mâo ênoh truh 300 êklăk prăk, lehanăn đru kơ phung F0; F1 giăm 400 êklăk prăk. Anôk bruă bi ala mâo nanao klei mtă mtăn kơ jih jang Sang Aê Diê Klei Mrâo Mrang Jăk hlăm kluôm čar ngă bi sĭt 5 mta klei mtă mơ̆ng phŭn bruă mdrao mgŭn, lehanăn djăp mta bruă mdrơ̆ng hŏng klei ruă tưp. Lehanăn mkŏ mjing êpul “Aê mdrao Luk” đru kčĕ kơ klei suaih pral hŏng online hŏng mnuih amâo mâo mhyun djŏ hĕ klei ruă tưp Covid 19./.