VOV4.Êđê - Hrue mbrue (14/2), dŭm boh sang hră hđeh điêt, gưl sa hlăm čar Daklak klă klơ̆ng drông leh hđeh hriăm hră leh êbeh 8 mlan dôk hriăm online. Khădah mâo mprăp êmiêt leh ai tiê klei mĭn brei anak nao sang hră, ƀiădah amĭ ama dôk hyưt kyua phung hđeh adŭ điêt, hđeh gưl sa ka tlŏ mgang ôh, ka thâo săng ôh kơ klei bi ktlah, snăn jing dleh êdi kơ phung hđeh tui gưt klei bhiăn mdrơ̆ng hŏng klei ruă tưp. Čiăng mkŏ mjing bruă mtô bi hriăm hŏng klei tŭ jing, êlâo anăn knơ̆ng bruă sang hră mơar čar Daklak mkŏ mjing leh êpul ksiêm dlăng ti dŭm boh sang hră, rơ̆ng hlăm bruă mdrơ̆ng hŏng klei ruă tưp.

Thŭn hriăm 2021 -2022, čar Daklak mâo leh êbeh 1 êbâo boh sang hră hŏng êbeh 450 êbâo čô hđeh djăp gưl. Wưng anei jih jang phung knuă druh, nai mtô mnuih ngă bruă hlăm knơ̆ng bruă sang hră mơar Daklak mâo tlŏ leh vaccine ƀiă êdi dua aruăt čiăng gang mkhư̆ klei ruă tưp covid 19, lehanăn êbeh 20% mâo tlŏ leh aruăt tal 3./.

Y-Khem pô mblang