VOV4.Êđê- Klei mplư luar čhĭ mnơ̆ng dhơ̆ng lŏ ba wĭt prăk, sa hdră klei mplư mâo hlăm lu alŭ wăl ngă kơ lu mnuih luč prăk kăk hơăi mang, mâo leh anôk bruă klei mrâo hưn brei răng nanao. Ƀiădah klei mplư anei mrâo mâo ti ƀuôn prŏng Ƀuôn Ama Thuôt, čar Dak Lak.

Djă ti kngan sa boh gŏ amâo mâo thâo ƀlĭt hŏng ênoh 650 êbâo prăk, ƀiădah knŏng mâo yua mă sa blư̆ hlŏng kđuh đuĕ jih tal gang ƀlĭt, H’Lĭ Niê ti ƀuôn Êrang, ƀuôn hgŭm Khánh Xuân, ƀuôn prŏng Ƀuôn Ama Thuôt, čar Daklak, miu mmao čiăng hiă lač: “Kâo lĕ hlăm klei arăng mplư leh”. Hlăk akŏ hrue kăm anei, mâo dŭm čô mnuih amâo mâo thâo kral ôh nao mŭt hlăm ƀuôn hiu mbha hră lač kơ klei lông ba yua mnơ̆ng sang pui, mâo mbĭt hŏng lu mta klei ƀuăn lač, srăng lŏ ba wĭt prăk, tơdah amâo mâo jăk. Snăn bi nao hlăm klei anei ñu mă 3 mta mnơ̆ng mâo gŏ amâo mâo thâo ƀlĭt, gŏ tŭn êwa hlơr, lehanăn gŏ tŭk lẩu, ƀiădah ka yŏng mâo yua ôh, jih jang mnơ̆ng anăn liê truh giăm 5 êklăk prăk:

“Phŭn tal êlâo diñu hiu duah mdah gŏ ti siêu thị amâo mâo čhĭ ôh, hŏng ênoh kơ anei jing 4 êklăk sa. Lehanăn ñu hŏng ênoh 4 êklăk sa si ngă mâo mnuih čiăng blei mơ̆, tơdah tloh blei mơh prăk amâo mâo luič ôh, mbloh lŏ ba wĭt. Leh kơ anăn truh kơ gŏ čhang 650 êbâo prăk. Amâo lŏ mĭn ôh dŏ anei jing klei arăng mplư amâodah hơăi. Bruă ka yŏng leh, pô dlăng ka nik mơh, ka mâo mjuă ôh, ƀiădah bhiâo riâo rit ñu đuĕ mliêt, snăn kơh thâo jing dŏ hiu duah mplư”.

H’Nghiêm Niê yăl dliê kơ bruă arăng mplư giăm 5 êklăk prăk

Ăt jing mnuih lĕ hlăm klei arăng mplư mơh hŏng anôk mkŏ mjing msĕ snăn hlăm sa anôk čhĭ mnia ti ƀuôn hgŭm Khánh Xuân hlăm aguah hrue 4/10, H’Ngiêm Niê, ti ƀuôn Êrang yăl dliê, hdră anei knŏng brei kơ phung mniê, phung êkei amâo mâo dưi nao mŭt ôh. Phŭn tal êlâo, ñu knŏng blei msĕ si êa msĭn, êa rao čhiên mngan, kbu boh mnơ̆ng hŏng ênoh dŭm êtuh êbâo prăk, lehanăn mâo bi tĭng tla ênŭm. Truh giăm yang hrue dơ̆ng, phung hưn kơ mnơ̆ng anăn lač srăng čhĭ yơh mnơ̆ng mâo ênoh, lehanăn ăt srăng lŏ ba wĭt prăk kơ mnuih blei tơdah amâo lŏ ư ôh hŏng mnơ̆ng anăn. H’Ngiêm Niê, ruăt nao wĭt kơ ƀuôn mtam duah čan mâo 5 êklăk prăk čiăng blei mnơ̆ng, leh kơ anăn kơh thâo phung anăn jing phung hiu duah mplư, đĭ êdeh ôtô đuĕ leh:“Phung ƀuôn sang dôk bi guôn yơh, ƀiădah amâo lŏ ƀuh ôh diñu bi wĭt prăk, lehanăn ƀuh mnuih ngă bruă ti anăp, kdŭn đuĕ lehanăn hlŏng bi êran đuĕ mơh. Diñu mưn phung asei prŏng êmŏng phung pêrat năng ai dôk ti anăp sang čhĭ mnơ̆ng Thu Hương, lehanăn êwak jih mnơ̆ng hlŏng đuĕ, prăk arăng diñu amâo lŏ bi wĭt”.

Y-Hiêp Niê, khua ƀuôn, ƀuôn Êrang ƀuôn hgŭm Khánh Xuân lač, jih jang mnơ̆ng phung ƀuôn sang ba wĭt jing mnơ̆ng hơăi mang dŏ amâo mâo tŭ ôh, lehanăn kăn thâo bĭt klă phŭn agha rei:

“Knơ̆ng bruă anôk duh mkra anei mplư phung ƀuôn sang. Anei ăt jing klei hriăm kơ phung ƀuôn sang hlăm ƀuôn. Ăt čang hmăng kơ dŭm dhar bruă djŏ tuôm, anôk bruă kahan ksiêm mghaih msir klei anei bi mngač”.

Dŭm pluh čô mnuih Ƀuôn Êrang ngêñ kyua arăng mplư

    Nguyễn Đình Chung, Khua knơ̆ng bruă sang čư̆ êa ƀuôn hgŭm Khánh Xuân, ƀuôn prŏng Ƀuôn Ama Thuôt, lač, leh hmư̆ klei phung ƀuôn sang hưn, snăn knuă druh ƀuôn hgŭm nao kơ anôk anăn, ƀiădah phung čhĭ mnơ̆ng anăn đuĕ leh. Tui si klei bi mklă tal êlâo, klei anei mâo hlăm brô 500 čô mnuih ti ƀuôn hgŭm Khánh Xuân lehanăn dŭm boh să Hoà Xuân, Hoà Khánh, Hoà Phú bi nao blei. Mnuih blei ƀiă jih hlăm brô 650 êbâo prăk, mnuih blei lu truh giăm 9 êklăk prăk.

       Phung hiu čhĭ mnơ̆ng anăn mâo 2 čô mniê, 8 čô êkei, đĭ êdeh ôtô mdiăng mnơ̆ng mrô 60B-04422 lehanăn êdeh ôtô 16 anôk mrô 60B-52809. Êlâo anăn, phung anei čŏng hưn diñu jing phung bi ala kơ knơ̆ng bruă ISHIBA, truh hlăm dŭm anôk lu mnuih msĕ si ti sang mnia, ti ƀăng jang sang hră... Hiu mbha hră bi lar mnơ̆ng čhĭ mnia, iêo jak lông ba yua mnơ̆ng diñu. Chung lač, bruă mkŏ mjing msĕ snei amâo mâo hưn mthâo hŏng bruă sang čư̆ êa ôh alŭ wăl:

“Klei anei jing klei soh prŏng êdi, kyuadah čhĭ mnơ̆ng bi mâo sa hdră êlan mă bruă, amâo mâo djŏ knŏng hiu duah hưn kơ klei čhĭ mnơ̆ng lehanăn mâo čhĭ msĕ snăn ôh. Wăt hlăm klei leh mă bruă sang čhĭ mnia anăn kdjăt mơh, leh phung mưn anôk čiăng čhĭ mnia anăn, ƀiădah diñu kăn thâo rei ya mta mnơ̆ng phung dih čhĭ, lehanăn si klei mplư hĕ phung ƀuôn sang. Ară anei tĭng kơ ƀuôn hgŭm hlăk dôk kiă kriê dŭm anôk bruă djŏ tuôm, hlăm anăn mâo kahan ksiêm nao ksiêm bi mklă, čiăng ngă bi mngač, čiăng kơ phung ƀuôn sang amâo lŏ lĕ hlăm klei arăng mplư ôh”.

Gŏ khang yua sa blư̆ jhat leh jih

Dŭm êtuh čô mnuih hlăm ƀuôn prŏng Ƀuôn Ama Thuôt, čar Daklak lĕ hlăm klei arăng mplư nao hlăm anôk lông ba yua mnơ̆ng, ƀiădah boh sĭt anăn jing anôk mplư čhĭ mnơ̆ng mgưt. Hŏng mnêč duah mplư msĕ snei amâo mâo djŏ mrâo anei ôh mâo, ƀiădah brei ƀuh dŭm anôk k’hư hlăm bruă kiă kriê klei mnia mblei, lehanăn bruă răng mgang klei êđăp ênang hlăm alŭ wăl, tơdah mâo hĕ dŭm mta klei msĕ si mtluk mtlak, bi ngi lu mnuih, ƀiădah kăn yŏng thâo ƀuh rei mnêč jhat mplư kyuanăn yơh amâo mâo hmăr mghaih msir ôh./.

Pô mblang: Y-Khem Niê