VOV4.Êđê- Hlăm dua hrue (24-25/3), kdriêk Čư̆ Kuiñ, čar Daklak mkŏ mjing leh knăm bi kƀĭn prŏng Êpul bruă êdam êra Cộng sản Hồ Chí Minh tal 4, wưng păn bruă 2022 – 2027. Anei jing êpul êya krĭng mnuih djuê ƀiă mâo leh bruă Êdam êra čar Daklak ruah ngă anôk bi hmô. Tui si klei hâo mdah ti anôk bi kƀĭn, hlăm 5 thŭn êgao, bruă êdam êra ti kdriêk Čư̆ Kuiñ mâo leh lu klei tŭ dưn jăk msĕ si: Rŭ mdơ̆ng mkra wĭt truh 31 anôk hlăp mbul kơ hđeh êlăk, sang bi đru, sang kơ hđeh hriăm hră dleh dlan.

Đru kčĕ lehanăn hưn mdah bruă ngă kơ 5 êbâo 500 čô êdam êra, lehanăn đru truh 72 čô êdam êra čhuai êlan lŏ wĭt hlăm klei ênuah. Mkŏ mjing dŭm pluh boh adŭ mtô bi hriăm lue, lehanăn bi hriăm knhuah hdĭp kơ phung hđeh. Dŭm anôk bruă êdam êra mâo ngă leh 44 mta bruă êdam êra, hŏng ênoh jih jang êbeh 650 êklăk prăk. Klei bi kƀĭn prŏng anei mâo ruah leh Êpul khua kiă kriê bruă êdam êra kdriêk Čư̆ Kuiñ, tal 4, wưng păn bruă 2022 - 2027, mâo 21 čô lehanăn khua kiă kriê mplĕ hră klă anăp mtam ti anôk bi kƀĭn prŏng./.

Pô mblang: Y-Khem Niê