VOV4.Êđê - Čiăng mprăp kơ thŭn hriăm mrâo 2022 – 2023. Lu phung amĭ ama leh anăn hđeh sang hră ti čar Dak lak dôk mjêč tui duah hdruôm hră hriăm, boh nik jing hdruôm hriăm adŭ 3,7,10. Lu phung amĭ ama uêñ mĭn srăng kƀah hin druôm hră kyuadah thŭn anei jing thŭn tal êlâo hluê ngă hdră mtô bi hriăm mrâo.

Thŭn anei Đỗ Hùng Thuận, ƀuôn hgŭm Tân An, ƀuôn prŏng Ƀuôn Ama Thuôt nao blei hdruôm hră hriăm kơ anak, ƀiădah lŏ dôk guôn. Ñu brei thâo: Thŭn anei ba yua hdră mđĭ mlih mrâo, hdruôm hră hriăm ară anei mâo 3 hlâo mâo anôk čhĭ hdruôm hră mơar ba čhĭ jing hlâo Cánh Diều, hlâo Chân trời sáng tạo, hlâo Kết nối trí thức, lehanăn sang hră anôk ñu hriăm akâo brei brei mơ̆ng lu anôk mkăp hdruôm hră hriăm mdê mdê. Klei anei ba klei dleh dlan kơ ñu čiăng nao blei hră: Tui hlue mdê bi sang hră, mâo dŭm hlao hdruôm hră hriăm mdê mdê, snăn bi dôk guôn phung nai ruah, amĭ ama hđeh amâo mâo thâo bĭt êlan ôh, ti hră srăng ruah, lehanăn dŭm srăng blei čiăng bi djăp kơ anak hriăm hră”.

Bi hŏng hđeh hriăm hră msĕ si adei Phan Ngọc Hân, hđeh hriăm hră adŭ 7A4, sang hră gưl 2 Nguyễn Tất Thành, kdriêk Čư̆ Mgar khădah sang hră mâo leh ênoh mta hdruôm hră brei hriăm, ƀiădah čiăng blei hră ăt ka djăp mơh, gơ̆ brei amĭ ama nao atăt truh kơ sang čhĭ hră hriăm ti ƀuôn prŏng Ƀuôn Ama Thuôt mơh: “Kâo mơ̆ng kdriêk Čư̆ Mgar hriê, truh kơ anei kâo amâo mâo thâo bĭt ôh ti hră srăng ruah lu mta hlâo hră mdê mdê msĕ si Chân trời sáng tạo, kết nối tri thức, cánh diều. Ƀiădah leh mâo sang hră kčĕ brei snăn kâo mâo ruah leh mơh dŭm mta hdruôm hră djŏ pioh hriăm”.

Tui si klei čoh čuăn mrô 1360, hrue 16/6/2022 mơ̆ng knơ̆ng bruă sang čư̆ êa čar Daklak kơ bruă bi mklă mta hdruôm hră hriăm kơ adŭ 3, adŭ 7 lehanăn adŭ 10 ba yua kơ dŭm boh sang hră phổ thông mơ̆ng thŭn hriăm 2022 - 2023 hlăm čar, bi hŏng hđeh adŭ 3 jing mâo truh 21 mta hră; adŭ 7 mâo truh 26 mta hră, hjăn adŭ 10 mâo truh 44 mta hră, snăn mơ̆ng jih 3 hlâo hdruôm hră mâo anăn Cánh diều; Chân Trời sáng tạo lehanăn Kết nối tri thức hŏng ênoh jih jang jing truh 138 mta hră, wăt hŏng hră čŏng ruah, lehanăn hdruôm hră mgô brei blei.

Trương Văn Băng, khua kiă kriê knơ̆ng bruă mkăp čhĭ kdrăp hriăm hră mơar čar Daklak brei thâo: Čiăng dưi mâo djăp hdruôm hră hriăm kơ thŭn hriăm mrâo, boh nik hŏng dŭm gưl adŭ hriăm ba yua hdră mjuăt bi hriăm phổ thông thŭn 2018, knơ̆ng bruă anei mâo tiŏ nao leh mnuih ngă bruă, mprăp anôk čhĭ, mkŏ mjing klei mjuăt bi hriăm kơ mnuih ngă bruă kăp kčĕ brei kơ amĭ ama hđeh, hđeh hriăm hră lehanăn dŭm anôk čhĭ hdruôm hră hriăm bi hrŏng ruah, lehanăn blei bi djŏ. “Dŭm boh sang hră, alŭ wăl, dŭm kdriêk, wăl krah, ƀuôn prŏng, bi ruah hră hriăm mdê mdê, lehnăan amâo mâo klei msĕ ôh, mơ̆ng anăn mơh anôk bruă anei tuôm hŏng lu klei dleh dlan mơh hlăm klei čiăng mkăp djăp ênŭm hdruôm hră hriăm kơ phung hđeh hlăm čar Daklak, amâo mâo lui truh kơ klei kƀah hdruôm hră mơar ôh, wăt hŏng ya anôk thŭn hriăm 2022 - 2023 anei”.

Bruă mprăp hdruôm hră hriăm kơ thŭn hriăm mrâo jing jih jang klei mâo phung amĭ ama hđeh mđing êdi. Kyuanăn čiăng đru hlăm bruă duah hdruôm hră hriăm bi djŏ mta mtrŭn, knơ̆ng bruă sang hră mơar čar Daklak mâo leh hră mtrŭn truh hŏng djăp sang hră hưn bi pral ênoh mta hdruôm hră hriăm kơ thŭn hriăm mrâo. Lehanăn mtă kơ amĭ ama hđeh, răng mơh êjai blei hlăm akŏ thŭn boh nik hlăm mlan 8 anei, amâo mâo bi tiŏ bi êran ôh, ƀiădah duah blei hdruôm hră hriăm hŏng klei nik, klei djŏ, bi nao blei hdruôm hră hriăm ti anôk čhĭ mâo leh k’hưm, răng huĭdah blei djŏ hdruôm hră mgưt, hdruôm hră amâo mâo jăk, lehanăn blei soh hdruôm hră hriăm.

Knơ̆ng bruă sang hră mơar čar Daklak ăt mtrŭn leh mơh hră ktrâo atăt mkŏ mjing hrŏng ruah hdruôm hră hriăm kơ dŭm adŭ hriăm jing adŭ 3; adŭ 7; lehanăn adŭ 10 kơ thŭn hriăm 2022 - 2023 bi djŏ hŏng klei mlih mrâo hdruôm hră hriăm tui si Phŭn bruă sang hră mơar mtrŭn leh. Mơ̆ng anăn, knơ̆ng bruă sang hră mơar mtă kơ jih jang sang hră hlăm čar mâo bruă đua klam mkŏ mjing hdră hlue ngă hrŏng ruah hdruôm hră hriăm djŏ hŏng klei Phŭn bruă sang hră mơar lehanăn knơ̆ng bruă sang čư̆ êa čar čoh čuăn; knơ̆ng bruă ăt bi klă, bi kjăp hdră êlan mă bruă mâo hră ktrâo atăt, kiă kriê kơ klei bi mlih hdră mjuăt bi hriăm phổ thông, lehanăn hdră ruah hdruôm hră hriăm čiăng kơ jih jang phung knuă druh, nai mtô, mnuih ngă bruă, hđeh hriăm hră lehanăn amĭ ama hđeh thâo.

Êlâo anăn, čiăng mjing klei găl kơ phung knuă druh kiă kriê, nai mtô lehanăn amĭ ama hđeh mâo mmông ksiêm duah lehanăn păn kjăp mta hdruôm hră mơ̆ng anôk kđăp mkra hdruôm hră mơar, knơ̆ng bruă sang hră mơar čar Daklak hgŭm leh hlue ngă 2 gưl hưn mdah hdruôm hră hriăm kơ adŭ 3, adŭ 7 lehanăn adŭ 10 hlue hŏng hdră online plah wah knơ̆ng bruă sang hră mơar, dŭm anôk kđăp mkra hdruôm hră hriăm lehanăn dŭm boh sang hră srăng yua hdruôm hră anăn hlăm čar./.

Y-Khem pô mblang