VOV4.Êđê -  Djŏ tuôm hŏng klei đa đa alŭ wăl nga klei bi ktlah mnuih wĭt kơ ƀuôn sang pô čiăng ƀơ̆ng tết Nguyên đán Nhâm Dần 2022, Knơ̆ng bruă sang čư̆ êa čar Daklak mâo leh hră mtrŭn kơ djăp alŭ wăl hlue nga amâo mâo bi ktlah ôh mnuih wĭt kơ ƀuôn sang pô ƀơ̆ng tết, ƀiădah knŏng ngă dŭm bruă tui si phŭn bruă mdrao mgŭn mtă pioh gang mkhư̆ klei ruă tưp Covid 19. Leh boh klei sang êa drao Să Ea Ƀlang, wăl krah Ƀuôn Hô, čar Daklak brei phung ƀuôn sang pô wĭt ƀơ̆ng tết ngă klei bi ktlah hlăm 7 hrue, khădah tlŏ mgang leh djăp ênŭm 3 aruăt vaccine, hlăm hrue 26/1, Knơ̆ng bruă sang čư̆ êa čar Daklak mâo mtam hră mtrŭn kơ Êpul kiă kriê bruă mdrơ̆ng hŏng klei ruă tưp ti dŭm kdriêk, wăl krah, ƀuôn prŏng ksiêm dlăng, kiă kriê dŭm êpul êya, alŭ wăl pô, amâo mâo dưi duah ngă tui si pô čiăng ôh hlăm hdră mdrơ̆ng hŏng klei ruă tưp soh hĕ hŏng hdră mtrŭn mơ̆ng knŭk kna, lehanăn phŭn bruă mdrao mgŭn, ngă bi dleh hĕ kơ phung ƀuôn sang ƀơ̆ng tết. Yap truh kơ hrue 27/1, car Daklak mâo leh truh 15 êbâo 714 čô mnuih djŏ klei ruă tưp Covid 19, hlăm anăn adôk 2 êbâo 456 čô mnuih hlăk dôk mdrao mgŭn lehanăn 85 čô mnuih djiê./.

Y – Khem pô mblang