VOV4.Êđê- Leh sa wưng klei ruă tưp Covid-19 mâo klei hrŏ, dŭm hruê giăm anei, ti alŭ wăl čar Dak Lak, ênoh mnuih mâo klei ruă tưp Covid-19 lŏ đĭ hĭn. Knŏng hlăm 20 hruê giăm anei, čar Dak lak mâo giăm 600 čô mâo klei ruă tưp Covid-19, êjai anăn hnơ̆ng tlŏ mgang vaccine ka mâo djăp ôh mkă hŏng hdră kčah mơ̆ng phŭn bruă mdrao mgŭn jao leh ngă kơ bruă gang mkhư̆ klei ruă tưp Covid-19 ti čar Dak Lak tuôm hŏng lu klei dleh dlan. Si bruă mdrao mgŭn srăng mgaih msir klei anei? Pô čih klei mrâo Nam Trang mâo klei blŭ hrăm hŏng Nay Phi La, khua kiă kriê knơ̆ng bruă mdrao mgŭn čar Dak Lak kơ mta phŭn anei:

-Akâo kơ ih brei thâo si klei ruă tưp Covid 19 dôk găn ti čar Daklak hlăm wưng giăm anei?

 Nay Phi La: “Hlăm čar Daklak yap truh ti hrue 12/9 ênoh mnuih djŏ klei ruă tưp Covid 19 lŏ đĭ lu, ară anei mâo leh 578 čô mnuih. Ênoh lŏ đĭ hlăm wưng giăm anei kbiă hriê mơ̆ng lu klei, tal êlâo khădah mâo mkŏ mjing tlŏ leh vaccine truh kơ aruăt tal 4, ƀiădah mbĭt anăn sa lu phung hđeh leh djŏ klei ruă tưp Covid 19 ka lŏ tlŏ mgang ôh. Boh nik hŏng mnuih prŏng leh tlŏ aruăt tal 3 ăt bi mĭn nanao pô mâo leh ai ktang dưi kdơ̆ng hŏng klei ruă tưp, snăn amâo lŏ bi nao tlŏ ôh aruăt tal 4, snăn hnơ̆ng ênoh djŏ klei ruă tưp anei hlăm mnuih khua thŭn lŏ đĭ lu hĭn. Anei ăt jing sa klei dôk hyưt êdi hlăm phung ƀuôn sang kyua amâo mâo thâo săng kơ bruă tlŏ vaccine ti wưng anei”.

-Snăn drei dưi ƀuh, hlăm bruă mdrơ̆ng hŏng klei ruă tưp Covid 19 anei, vaccine yơh jing kdrăp yuôm bhăn, siămdah tui si ênoh yap mơ̆ng Knơ̆ng bruă mdrao mgŭn ênoh mnuih mơ̆ng 18 thŭn kơ dlông tlŏ vaccine Covid 19 aruăt tal 3 truh 86%, lehanăn aruăt tal 4 êbeh 60%. Hđeh mơ̆ng 12 thŭn truh 17 thŭn, tlŏ aruăt tal 3 djăp 68%, lehanăn phung hđeh mơ̆ng 5 thŭn truh kgŭ 12 thŭn aruăt tal 1 giăm 90%, lehanăn aruăt tal 2 truh 45%. Ênoh anei jing ƀiă hĭn êdi mkă hŏng ênoh kčah mơ̆ng phŭn bruă mdrao mgŭn, snăn si hdră čiăng kơ ênoh mâo tlŏ vaccine gang mkhư̆ klei ruă tưp Covid 19 hlăm wưng kơ anăp?

Dak Lak : mđĭ ktang tlŏ vaccine gang mkhư̆ klei ruă tưp Covid 19

Nay Phi La: “Ti anăp klei msĕ snăn, Phŭn bruă mdrao mgŭn mâo leh hdră mtrŭt mjhar “Kyua sa Việt Nam kjăp, lehanăn suaih pral hlăm yang ƀuôn, lehanăn hlăm jih jang kdrăp hâo hưn, snăn dhar bruă mdrao mgŭn mkŏ mjing leh hdră srăng hgŭm hŏng knơ̆ng bruă sang hră mơar čar Daklak mbĭt hŏng dŭm kdriêk, wăl krah, lehanăn jih jang bruă kđi čar trŭn ngă bruă anei. Tui si hdră hrue 24/9 anăp anei, knơ̆ng bruă sang čư̆ êa čar srăng lŏ mkŏ mjing bruă mtrŭt mjhar, mdrơ̆ng hŏng klei ruă tưp hlăm boh klei mrâo, mâo anăn “Kyua sa Việt Nam kjăp ktang, suaih pral” lehanăn tlŏ vaccine gang mkhư̆ klei ruă tưp Covid 19 kơ phung hđeh. Mbĭt hŏng anăn, dhar bruă mdrao mgŭn srăng mkŏ mjing klei tlŏ mgang ti sang hră mtam, čiăng kơ jih jang phung hđeh pral mâo tlŏ mgang ênŭm, lehanăn djăp hŏng ênoh kčah čuăn “Kyua sa Việt Nam kjăp ktang, suaih pral”.

-Akâo kơ ih lŏ mblang, êjai klei ruă tưp Covid 19 dlông rŏng lăn dôk dleh thâo tĭng knăl, lehanăn hlăm ala čar msĕ mơh ênoh mnuih djŏ klei ruă tưp anei ăt dôk đĭ, lehanăn mâo lu klei bi mlih mơ̆ng kman virus Sar CoV 2, Snăn hlăm wưng êgao Phŭn bruă mdrao mgŭn mâo mtrŭn leh klei mtă bruă mdrơ̆ng hŏng Covid 19 hlăm boh klei mrâo anăn jing 2 mta klei mtă ya jing dŏ anăn?

Nay Phi La: “Dua mta klei mtă anăn jing bi mdjiê kman, lehanăn mgô̆ truă čhiăm guôm ƀô̆ hŏng phung arăng đing, êjai dôk hlăm anôk lu mnuih, msĕ si hlăm sang mnia, amâodah hlăm sang krĭp, snăn bi truă hĕ čhiăm guôm ƀô̆ yơh, lehanăn ngă klei bi mdoh kman. Mbĭt hŏng anăn lŏ dơ̆ng ngă nanao bruă tlŏ vaccine, vaccine ară anei dưi mâo leh, lehanăn jih jang êa drao mdrao mgŭn, snăn jih jang dŭm boh sang êa drao lehanăn dŭm boh kdriêk mprăp leh djăp ênŭm, tơdah mâo mnuih ruă djŏ covid, lehanăn sa mta klei yuôm bhăn hĭng jing brei phung ƀuôn sang mâo klei thâo săng, khădah drei dưn găn leh hŏng wưng yap jing huĭ hyưt hĭn êdi, ƀiădah brei drei mâo klei bi răng nanao hŏng hdră tlŏ nanao vaccine djŏ hŏng klei phŭn bruă mdrao mgŭn mtă mtăn, snăn kơh drei srăng dưi gang mkhư̆ jih klei ruă tưp Covid 19”.

-Lač jăk kơ ih lu!

Pô mblang: Y-Khem Niê