Bruă anei kčưm kơ klei mtrŭt mđĭ, iêo jak lu tue hiu čhưn hlăm thŭn, đru atăt bruă hiu čhưn ênguê jing bruă duh mkra phŭn mơ̆ng čar. Anei ăt jing wưng mâo klei mpŭ mni kơ boh tŭ dưn hƀuê ênuk, kơ dhar kreh, anak mnuih lăn dap kngư, mbĭt anăn kkuh mơak 51 thŭn hruê Phú Yên mâo klei êngiê. Hŏng jih jang bruă ngă anăn, Daklak hưn mdah klei jing bŏ hŏng knhuah gru djuê ana, thâo jĕ giăm, lehanăn iêo jak jăk tue hriê čhưn hlăm ala čar lehanăn mơ̆ng ala tač êngao.

Anei jing wưng čar Daklak mkŏ mjing dŭm bruă kơ klei hiu čhưn ênguê, msĕ si: Klei rang mdah mnơ̆ng dhơ̆ng čhĭ mnia – hiu čhưn ênguê, OCOP & dŭm mta mnơ̆ng yuôm bhăn mơ̆ng alŭ wăl, mâo hdră mdah klei kdŏ muiñ, mâo êpul famtrip ksiêm dlăng, mbĭt hŏng dŭm klei bi kƀĭn ksiêm wĭt bruă hiu čhưn ênguê “Daklak – wĭt kơ krĭng knhuah gru”, mơ̆ng anăn mđĭ hĭn klei bi hgŭm, iêo jak klei duh bi liê, lehanăn mđĭ kyar bruă hiu čhưn ênguê hŏng klei kjăp./.