Ti Anôk kiă kriê bruă duh bi liê rŭ mdơ̆ng kdriêk Čư̆ Mgar, ai êwa mă bruă dŭm hrue anei hŏng klei pral. Bùi Châu Lĩnh, Khua anôk bruă brei thâo, phung knuă druh mă bruă tơl mă bruă êngao mmông aguah tlam, wăt hlăm knăm 6 lehanăn knăm 7 čiăng bi leh bruă bao jao hră mơar:

 “Mơ̆ng dŭm thŭn hlue ngă bruă, snăn mâo lu mta hră mơar, mđĭ ai phung ayŏng adei gĭr bi leh bruă kčah jao”.

Ti anôk mă bruă sa ƀăng bhă mơ̆ng knơ̆ng bruă sang čư̆ êa kdriêk Čư̆ Mgar - anôk tŭ mă lehanăn mghaih msir dŭm mta hră mơar, ênoh hră mơar jing lu, êjai mnuih ƀuôn sang hnêč čiăng bi leh hră mơar êlâo kơ bruă sang čư̆ êa kdriêk bi kruh. Mbĭt hŏng bruă bi leh dŭm mta hră mơar djŏ hrue kčah, êpul ngă bruă sa ƀăng bhă hlăm kdriêk lŏ ktrâo atăt kơ hdră mă bruă hlăm wưng tinăp, leh dŭm boh ƀuôn hgŭm mrâo dơ̆ng mă bruă. Knơ̆ng bruă sang čư̆ êa kdriêk Čư̆ Mgar ăt čŏng dăp anôk mă bruă, lehanăn mbha bruă klă mngač čiăng kơ đăm hmăi amâo mâo jăk ôh hlăm klei mă bruă hŏng mnuih ƀuôn sang. Nguyễn Công Văn, K'iăng khua knơ̆ng bruă sang čư̆ êa kdriêk mñă:

 “Bi hŏng bruă kiă kriê snăn hmei mâo leh klei gĭt gai kơ dŭm boh adŭ bruă, anôk bruă truăn kơ klei bi mklă dŭm bruă dleh bi ruh mgaih mtam, lehanăn mâo dŭm klei akâo. Kơ ya mta bruă jing dưi ngă snăn ăt jing knơ̆ng lŏ dơ̆ng čuê hlăm bruă knuă ti anăp. Bi bruă djŏ tuôm hŏng lăn ala, hŏng ngăn dŏ wăl hdĭp mda ƀiădah ka mâo ôh hră mơar ktrâo atăt kơ mnuih ƀuôn sang, dŭm êpul bruă kñăm brei mâo klei thâo bi đru hŏng kdriêk hlăm bruă dôk ngă ară anei”.

 Bi ti wăl krah Ƀuôn Hô, bruă lŏ mkŏ jih bruă sang čư̆ êa, čiăng kơ alŭ wăl mghaih msir bi leh lu mta bruă prŏng hlăm wưng bhiâo. Đặng Gia Duẩn, Khua knơ̆ng bruă sang čư̆ êa wăl krah ƀuôn Hô  – brei thâo, khua kiă kriê wăl krah duh mĭn kơ bruă čuăn êjai ti ƀuôn hgŭm anôk mă bruă mrâo êjai, lehanăn lŏ mprăp kơ klei mă bruă ti dŭm boh ƀuôn hgŭm dôk ngă ară anei, čiăng bi leh jih jang bruă dôk hlăm gưl kdriêk kiă kriê.

 “Êlâo kơ jih gưl mă bruă mơ̆ng bruă sang čư̆ êa kdriêk, snăn klei kơ ngăn prăk, klei kơ tiŏ nao mnuih mă bruă. Tal dua lĕ, drei hlăk mjing djăp klei găl pioh kơ dŭm boh ƀuôn hgŭm mrâo hlăm Ƀuôn Hô êlâo kơ klei bi mŭt srăng mâo dŭm klei găl hĭn hlăm anôk mă bruă, kơ mnuih mă bruă boh nik, kơ dŭm mta bruă lông dơ̆ng ngă, čiăng kơ truh hrue 1/7 ngă jăk mtam.”

Tui si hdră, hrue 25-26/6, dŭm anôk mă bruă mrâo mơ̆ng čar Daklak dơ̆ng lông mă bruă. Hrue 30/6, čar srăng mkŏ mjing lehanăn hưn mdah klei mkŏ mjingčar Daklak mrâo hŏng 102 êpul bruă ƀuôn hgŭm. Tui si Nguyễn Đình Trung, Khua hlăm êpul bruă Đảng gưl dlông, Khua bruă Đảng čar Daklak, mlih mrâo klei mĭn, lehanăn mđĭ hĭn bruă klam jing bruă hlăk mjêč hŏng phung knuă druh mnuih mă bruă hlăm anôk mă bruă mrâo:

 “Drei mơ̆ng grăp mta bruă mdê mdê mâo mtam klei bi mlih hdră êlan mă bruă čiăng bi djŏ lehanăn hmao hŏng klei čoh čuăn hlăm bruă mrâo. Knuă druh mnuih mă bruă ƀuôn hgŭm mrâo mkŏ leh hŏng čar, hŏng gưl dlông, kyuanăn brei mâo bruă klam jing kjăp hĭn. Bi mâo bruă čuăn kđi čar hŏng grăp čô knuă druh, boh nik hŏng knuă druh knơ̆ng hlăm gưl ƀuôn hgŭm mrâo brei jĕ giăm hŏng mnuih ƀuôn sang, sĭt suôr hŏng mnuih ƀuôn sang lehanăn mă bruă jăk kơ mnuih ƀuôn sang, djŏ hŏng klei mnuih ƀuôn sang čiăng”./.