VOV4.Êđê - Thŭn hriăm 2021 – 2022, čar Daklak mâo leh êbeh 34 êbâo 800 čô hđeh hriăm hră adŭ 12 srăng nao hlăm klei bi lông jih gưl, lu jing hlăm ênoh anei srăng lŏ ngă hră mơar hrŏng ruah mŭt hriăm gưl prŏng, gưl krah.

Čiăng mâo mjing klei găl hĭn kơ hđeh hriăm hră adŭ 12 pral mâo mă dŭm klei hâo hưn kơ klei bi lông hrŏng ruah Gưl prŏng, gưl krah, Knơ̆ng bruă sang hră mơar čar Daklak mtă leh kơ dŭm boh sang hră mâo klei bi hâo hưn plah wah nai mtô hŏng amĭ ama hđeh, hđeh hriăm hra thâo hŏng lu hdră, msĕ si nao bi tuôm mtam, mơĭt klei mtă, ba yua êlan hla pŏk zalo, Facebook... Mbĭt hŏng anăn, jih jang dŭm boh sang hră mjing djăp klei găl hŏng kdrăp mrâo mrang đru kơ phung hđeh ngă hră mơar, bi mlih klei čang hmăng mŭt hriăm hlăm dŭm boh sang hră leh mâo tŭ yap boh tŭ dưn klei bi lông jih gưl./.

Y- Khem pô mblang