VOV4.Êđê- Hlăm mlan 6 lehanăn mlan 7 leh êgao, anôk bruă pui kmlă Dak Lak mkŏ mjing leh lu hdră mtô mblang kơ klei ba yua pui kmlă êđăp ênang truh kơ gŏ sang phung knuă druh, mnuih mă bruă ti 16 anôk bruă pui kmlă lehanăn dŭm êpul ngă bruă. Hdră anei kñăm lar bra lehanăn mđĭ klei thâo săng kơ bruă rơ̆ng klei ba yua pui kmlă êđăp ênang hlăm bruă duh mkra pla mjing.

Anei jing gưl tal êlâo čar Daklak mkŏ mjing jih jang hdră hâo hưn kơ klei êđăp ênang pui kmlă truh hŏng găp djuê knuă druh mnuih ngă bruă, mnuih ngă bruă hlăm kluôm čar. Mơ̆ng anăn, mbĭt hŏng klei mdah rup dŭm klei yăl dliê sĭt hlăm klei čih “SOS- êđăp ênang čiăng wĭt truh kơ sang”, jih jang rup hâo hưn anăn mâo mă hlăm alŭ wăl, khua kiă kriê knơ̆ng bruă pui kmlă Daklak blŭ hrăm siă suôr hŏng phung knuă druh mnuih ngă bruă.

Sa hruê hâo hưn kơ găp djuê phung mă bruă pui kmlă

 Hdră anei mâo mâo leh klei sa ai jăk, dưi lar bra, lehanăn mđĭ klei thâo săng kơ klei êđăp ênang êjai ngă bruă hŏng gŭm gŏ sang. Amai Trần Thị Hiền, mô̆ ayŏng Nguyễn Xuân Bắc, mnuih ngă bruă pui kmlă Daklak, lač;

Mơ̆ng klei hâo hưn hrue mbrue đru leh kơ kâo thâo săng hĭn kơ bruă knuă ung kâo mă. Snăn gŏ sang hmei srăng dưi đru kơ ung kâo hơĭt ai tiê mă bruă, nao mă bruă amâo mâo klei gun kpăk amâodah rŭng răng bruă pưk sang ôh, čiăng kơ jih ai tiê duh mĭn kơ bruă pô hlăm klei êđăp ênang hĭn”.

Bi amai Lê Thị Mỹ Hạnh, mô̆ Đàm Thanh Cao, mnuih ngă bruă pui kmlă Dhŭng Ƀuôn Ama Thuôt, lač:

 “Kâo thâo săng kơ bruă kơ mnuih hlăm sang kâo dôk mă, jing bruă ba klei êđăp ênang hlăm bruă pui kmlă, snăn si klei bhiăn bi hlue ngă hĕ. Snăn kâo mâo klei thâo săng čiăng dưi đru kơ ung, lehanăn lŏ dơ̆ng thâo kčĕ brei kơ mnuih mkăn hlăm sang thâo săng mơh kơ klei anăn”.

Phung mă bruă pui kmlă tlă anăp hŏng klei huĭ hyưt sĭt mă bruă

Trần Tấn Phùng, Khua bruă Công đoàn, K’iăng khua knơ̆ng bruă pui kmlă Daklak, lač, hŏng hdră anei, knơ̆ng bruă čang hmăng grăp čô mnuih hlăm sang mnuih ngă bruă pui kmlă ăt jing pô kăp hâo hưn jăk, đru bi mtă mtăn hlăm grăp hrue kơ dŭm klei huĭ hyưt êjai ngă bruă. Lehanăn knơ̆ng bruă ăt mâo mơh klei akâo kơ dŭm êpul êya mkŏ mjing êpul Zalo hŏng mnuih hlăm găp djuê, čiăng kơ jih jang mnuih hlăm găp djuê thâo mơh kơ hrue mmông pô ngă bruă, lehanăn mâo klei blŭ, klei bi đru hŏng bruă knuă čiăng bi mâo klei êđăp ênang hĭn

Hŏng bruă pui kmlă jing bruă ktrŏ, tơdah tăm mâo hĕ klei jhat pui kmlă krah mlam, snăn mnuih hlăm sang đru bi mđĭ ai brei. Tal dua, čiăng rơ̆ng dưi mâo klei êđăp ênang hlăm bruă pui kmlă snăn bruă pui kmlă mâo halwm lu mta, hlăm anăn kơ ai tiê klei mĭn năng brei mâo klei mđing, đăm rŭng răng ôh. Snăn knơ̆ng bruă ăt čiăng hâo hưn truh hŏng mnuih hlăm găp djuê bi đru klam, bi mđĭ ai ngă bruă hlăm pưk sang, čiăng kơ ung kjar pô ngă bruă amâo mâo klei rŭng răng, amâo mâo klei dleh kpăk ôh ti anôk pô ngă bruă, čiăng bi mâo klei êđăp ênang hĭn”.

Dưi thâo leh jih jang bruă anei mâo ngă, Knơ̆ng bruă pui kmlă Daklak srăng ksiêm wĭt, mă klei hriăm ciăng mkŏ mjing sa hdră jĕ giăm hĭn, bi lu hdră hĭn hlăm djăp klei hâo hưn hlue si mta kñăm knhal tuič jing bi mâo klei êđăp ênang êjai mă bruă./.

         Pô mblang: Y-Khem Niê