VOV4.Êđê- Aguah mbrue (29/5), ti wăl krah Ƀuôn Hô, bruă êdam êra čar Daklak mkŏ mjing leh knăm trŭn kơ bruă êdam êra ba anăp yan mdei prŏng thŭn 2022, hŏng lu bruă nga ti 15 kdriêk, wăl krah, ƀuôn prŏng hlăm čar, mâo êbeh 10 êbâo čô êdam êra kluôm čar bi hgŭm. Hlăm knăm anei, bruă êdam êra čar Daklak bi liê leh truh 150 êklăk prăk đru mghaih msir bruă mă kơ phung êdam êra. Mđup brei truh 200 phŭn êđai kyâo pioh ba pla, mkra pui mtrang mngač êlan ƀuôn, rŭ mdơ̆ng sang bi đru, mkra anôk hlăp mbul kơ hđeh êlăk, lehanăn mdơ̆ng sa boh sang bi kƀĭn ƀuôn hŏng ênoh bi liê jih jang truh 370 êklăk prăk.

H’Giang Niê, Khua bruă êdam êra čar Daklak brei thâo, jih jang bruă ngă anei kñăm mđĭ ai klei thâo ba anăp mơ̆ng phung êdam êra hlăm klei mđĭ kyar bruă duh mkra ala ƀuôn, mkŏ mkra krĭng ƀuôn sang mrâo, ƀuôn prŏng dhar kreh, rơ̆ng kjăp kơ klei hdĭp mda ala ƀuôn, bruă răng mgang klei êđăp ênang, boh nik hŏng dŭm alŭ wăl dhar kreh krĭng knông lăn./.

Pô mblang: Y-Khem Niê