Klei ruă tưp covid-19 dưi msưh kdŭn leh, lehanăn hlăk mâo êpul kiă kriê bruă mdrơ̆ng hŏng klei ruă tưp pral mâo hdră êlan ksiêm dlăng klei ruă anei jing msĕ si klei ruă aguah tlam, ƀiădah truh ti wưng anei, čar Dak Nông ăt ka tĭng tla ênŭm mơh prăk đru mdul kơ phung nai aê mdrao hlăm wưng dôk mdrơ̆ng hŏng klei ruă tưp.

Ngă klei đru anei kơ phung nai aê mdrao tui si hdră mtrŭn mrô 16 thŭn 2021 mơ̆ng knŭk kna, leh lu gưl bi tĭng tla truh ti wưng anei čar Daknông adôk đuôm nư phung nai aê mdrao êbeh 32 êklai prăk. Ti anôk bi kƀĭn hŏng phung ngă bruă klei mrâo, Tôn Thị Ngọc Hạnh, k’iăng khua knơ̆ng bruă sang čư̆ êa čar Daknông, lač kơ dŭm klei êmưt đru ba kơ phung nai mdrao, kyua dleh dlan ngăn prăk, lehanăn hlue ngă bi djŏ klei bhiăn mă bruă./.