VOV4.Êđê - Aguah mbrue (27/5), knơ̆ng bruă sang čư̆ êa čar Daknông mkŏ mjing leh klei bi kƀĭn mđĭ mlih klei duh mkra mnia mblei, mâo lu phung duh mkra, phung khua kiă kriê dŭm knơ̆ng dhar bruă ti alŭ wăl, phung bi ala adŭ bruă duh mkra mnia mblei Việt Nam VCCI lehanăn phung bi ala mơ̆ng dŭm boh čar ba akŏ hlăm kluôm ala kơ ai bi ktưn gưl čar. Thŭn 2021, PCI čar Daknông dôk tal 52/63 boh čar, ƀuôn prŏng hlăm kluôm ala, đĭ 8 knhuang mkă hŏng thŭn 2020, kdlưn hĭn truh 7 knhuang mkă hŏng ênoh čuăn kčah.

Anei ăt jing tal prŏng hĭn alŭ wăl mâo hlăm 5 thŭn giăm anei. Mơ̆ng akŏ thŭn mtam, čar Daknông ksiêm wĭt leh jih jang klei dleh dlan gun kpăk kơ hdră duh bi liê ti alŭ wăl, tŭ mă lu klei blŭ mơ̆ng phung duh mkra kơ bruă anei. Khua knơ̆ng bruă sang čư̆ êa čar Daknông Hồ Văn Mười lač, gĭr mđĭ PCI thŭn 2022 lehanăn dŭm thŭn ti anăp rơ̆ng dưi hlue ngă, mâo klei tŭ dưn mjing klei găl kơ phung duh mkra, mă bruă hŏng klei klă mngač, mjing klei đăo knang kơ phung duh mkra mă bruă hơĭt lehanăn đĭ kyar./.

Y-Khem pô mblang