VOV4.Êđê- Tlâo êklăk phŭn kyâo srăng mâo čar Daknông pla ti dua nah êlan dơ̆ng, hlăm dŭm alŭ wăl rŭ mdơ̆ng ƀuôn sang, lehanăn hlăm alŭ wăl dliê pioh bi msiam ktuê êlan dơ̆ng prŏng ƀri bi hdơr 132 thŭn hruê kkiêng kơ khua gĭt gai Hồ Chí Minh. Klei anei mâo leh phung khua kiă kriê knơ̆ng bruă sang čư̆ êa čar Daknông bi êdah ti anôk bi kƀĭn hrue mbrue (17/5) kơ bruă mprăp bi hdơr 132 thŭn hrue kkiêng kơ khua gĭt gai Hồ Chí Minh, lehanăn knăm mtrŭt mjhar “Pla kyâo hdơr nanao kơ Awa Hô”.

Hlăm ênoh 3 êklăk phŭn kyâo mâo čar Daknông mtrŭt mjhar pla mjing gưl anei, mâo hlăm brô 1 êklăk phŭn jing hngô tlâo hla, dưi ba pla hlăm ktuê dua nah êlan dơ̆ng prŏng mrô 14 lehanăn mrô 28, pla hlăm dŭm alŭ wăl dliê bi msiam tuôm hĕ hŏng klei bi rai, ksĭng mmiă lăn dliê soh hŏng klei bhiăn. Hlăm bruă mtrŭt mjhar pla kyâo gưl anei hlăm aguah hrue 19/5, mbĭt hŏng jih jang êpul êdam êra, mnuih ngă bruă dŭm anôk bruă knŭk kna, čar iêo jak êbeh 3 êbâo 250 čô knuă druh, lĭng kahan nao bi pla kyâo ti dŭm čuê leh bi rai dliê ktuê êlan dơ̆ng prŏng mrô 14 lehanăn mrô 28./.

         Pô mblang: Y-Khem Niê