Truh ti ƀuôn Mỹ Khương, să Mỹ Tịnh An, kdriêk Chợ Gạo, čar Tiền Giang, jih jang mnuih thâo sơăi kơ Lê Văn Thủy, 58 thŭn jing sa čô đảng viên mnuih ngă lŏ hma thâo mbruă ti gưl ala čar. Ară anei ñu jing pô kơ sa boh đang war prŏng truh 1,8 ha lăn truăn kơ bruă pla ana boh guga. Thủy brei thâo, gŏ sang ñu êlâo dih pla knŏng mdiê snăn ênoh tŭ dưn jing amâo mâo prŏng ôh, snăn bi mlih pla ana guga tiê kô̆ giăm 30 thŭn êgao leh. Mơ̆ng thŭn 2012, mâo klei mtă mtăn, klei ktrâo atăt mơ̆ng anôk bruă truăn dlăng kriê ana guga, snăn ñu kčưm nao hlăm klei duh mkra pla mjing hluê ênoh čuăn Viet GAP lehanăn truh kơ Global GAP tui si klei bi hgŭm hŏng êpul hgŭm bruă Mỹ Tịnh An pioh čhĭ kơ ala tač êngao.

Kyua klei kreh kriăng hlăm bruă dlăng kriê wiê ênăk, lehanăn thâo ba yua klei kreh knhâo hlăm bruă duh mkra pla mjing boh guga pô snăn mboh hĭn lehanăn jăk hĭn mơh. Kah knar hlăm grăp thŭn, đang boh guga mâo pĕ truh kơ 3 yan mklăk yan, mboh mơ̆ng 50-60 tôn. Jih jang boh guga ñu pla mâo Êpul hgŭm bruă Mỹ Tịnh An hrui blei jih hŏng ênoh yuôm hĭn kơ êngao dŭm êbâo prăk/kg. Yan bhang không thŭn anei, đang boh guga ñu mâo hrui pĕ truh 20 tôn boh, čhĭ hŏng ênoh 22 êbâo prăk/kg, mâo ba wĭt 450 êklăk prăk.  Lê Văn Thủy yăl dliê:

“Čiăng pla mjing djŏ hŏng ênoh čuăn Global GAP yuôm bhăn kơnei jing drei thâo bi mlih hdră êlan mă bruă, bi dlăng kriê wiê ênăk doh, ba klei êđăp ênang kơ mnuih yua. Ară anei drei bi pla mjing doh yơh, amâo mâo krih êa drao hluăt ôh, knŏng prue hbâo brŭ, mnơ̆ng bi mbrŭ bi êbhuič lăn, mjing kơ lăn jăk jing hĭn , čiăng kư drei dưi mâo anôk pla mjing doh , lehanăn mâo boh mnga jăk, djŏ hŏng ai tiê mnuih blei yua čiăng”.

            Klei năng čih pioh jing hŏng đảng viên Lê Văn Thủy jing klei thâo gĭr, klei mbruă hlăm klei dlăng kriê wiê ênăk. Êjai anăn mâo lu snăk mnuih pla mjing  bi kluh pla mjing ana guga tiê hrah, ƀiădah ñu dê ăt knŏng duh mkra pla mjing mjeh guga tiê kô̆ đuič. Kyuadah tui si ñu, guga tiê kô̆ amâo mâo jăk mâo klei hluăt ƀơ̆ng mnơ̆ng ngă ôh, lehanăn mboh lu hĭn mơh, lehanăn mâo Mi lehanăn Ơrôp kăp blei. Wưng leh êgao, klei čhĭ mnia boh guga mâo anôk čhĭ amâo lŏ yuôm ôh, luič ênoh măng ai, ƀiădah ñu amâo mâo kdŭn ôh, lŏ dơ̆ng duh bi liê, dlăng kriê war boh bi jăk. Nguyễn Văn Nam, Khua să Mỹ Tịnh An lač, Lê Văn Thủy jing sa čô đảng viên kdlưn êdi hlăm klei duh mkra pla mjing hlăm să:

Thủy pla mjing hlue hdră VietGAP nao hlăm klei bi hgŭm hŏng êpul hgŭm bruă pla mjing djŏ hdră snăn mâo klei tŭ dưn jăk. Ară anei hdră ñu pla mjing mâo ba wĭt leh klei tŭ dưn prŏng êdi. Tal dua lĕ ñu krih hŏng bek pruih êa, mtlai mbĭt êa drao dhiang đĭng krih amâo mâo guôn hŏng giêt krih ôh, snăn amâo mâo klei dleh suăi msĕ si êlâo ôh, dưi mkiêt mkriêm lu kơ ênoh bi liê, snăn boh ga mâo ba wĭt jing lu mơh. Ară anei hŏng boh guga tiê kô̆ mâo ênoh êbeh15 êbâo prăk/kg jing hơĭt leh ”.

Mơ̆ng hdră êlan pla mjing ana guga pioh čhĭ mnia, gŏ sang Lê Văn Thủy dưi thâo mâo leh, hrui wĭt grăp thŭn hlăm brô 1,5 êklai prăk. Thŭn 2020, ñu mâo klei myun mâo khua knŭk kna mđup brei hră bi mni kơ klei tŭ dưn hlăm bruă duh mkra pla mjing. Êngao kơ năn ñu lŏ mâo Êpul hgŭm phung ngă lŏ hma gưl dlông Việt Nam, knơ̆ng bruă sang čư̆ êa čar Tiền Giang mđup brei hră bi mni kơ boh tŭ dưn hlăm jih jang bruă hlăm êpul hgŭm, lehanăn klei bi ktưn duh mkra pla mjing mbruă.

     Amâo mâo djŏ knŏng knhăk hlăm klei ngă bruă đuič ôh, ƀiădah đảng viên Lê Văn Thủy lŏ sang sa čô khua êpul phung ngă lŏ hma ƀuôn Mỹ Khương, să Mỹ Tịnh An. Wưng leh êgao, ñu jih ai tiê hlăm bruă êpul bi đru alŭ wăl, msĕ si bruă đru mnuih ngă lŏ hma dôk hlăm klei dleh dlan, đru mkra kban kdrông, êlan klông. Čŏng asei ñu pô mâo leh mơh truh êbeh 30 blư̆ nao myơr êrah. Lê Văn Thủy hưn:

“ Jing mnuih ngă lŏ hma Việt Nam giăm 60 thŭn leh jing sa čô dôk hlăm êpul mơ̆ng Đảng jing klei myun prŏng êdi leh. Hŏng asei ñu pô khădah anăn jing hnui leh, ƀiădah kâo ƀuh klei mĭn ai tiê bruă kđi čar jing khăp hŏng klei kiă kriê lehanăn hŏng Đảng, knŭk kna... Hlăm hrue kơ anăp kâo srăng gĭr hĭn hlăm djăp mta, boh nik bi hdĭp ênuah ênô, hdĭp kơ găp djuê, kơ ƀuôn sang, kơ yang ƀuôn, tui hriăm knhah mngač Hồ Chí Minh bi jăk, čiăng mâo keli bi hmô kơ anak čô tui hlue”.

      Giăm 60 thŭn leh, ƀiădah ai tiê dôk hur har hŏng bruă knuă pla mjing boh guga pioh ba čhĭ kơ ala tač êngao mơ̆ng sa čô đảng viên “ngă lŏ hma”  Lê Văn Thủy ăt dôk pral kdal. Ñu brei thâo, ñu dôk suaih pral snăn ăt dôk mă bruă hŏng găp djuê, kut kat duah klei mdrŏng sah mơ̆ng ana boh guga anei, čiăng ngă klei bi hmô kơ anak čô tui hlue./.