Ênoh prăk anei dưi yua čiăng mkra wĭt, msir anôk jhat rai ti êlan mâo boh taih 11,4 km găn să Đăk Plao, kdriêk Dak Mil. Hră anăn lŏ mkra wĭt jing tur êlan, ƀô̆ êlan, mnuôr mđoh êa khăt dua nah êlao leh anăn gơ̆ng mgang, mdhă hưn. Mmông ngă bruă hlăm 6 mlan leh anăn srăng bi leh ti knhal jih thŭn 2024. Bùi Văn Đoàn – Khua kiă kriê êpul kriê dlăng hdră mkra wĭt êlan klông (knơ̆ng bruă êlan klông leh anăn dŭ mdiăng čar Dak Nông) brei thâo, ară anei bruă mkra wĭt, mgaih msir mâo leh dŭm anôk bruă ngă êbeh 10%, rơ̆ng djŏ hŏng hdră kčah.

Êlan dơ̆ng mrô 14C găn čar Dak Nông mâo boh taih êbeh 162km, kčưm mơ̆ng kdriêk Ƀuôn Đon, čar Dak Lak ktuê knông lăn čar Dak Nông truh kơ kdriêk Bù Gia Mập, čar Bình Phước. Anei jing êlan dơ̆ng ala čar, mâo bruă klam yuôm bhăn hlăm bruă mđĭ kyar bruă duh mkra ala ƀuôn ti knông lăn čar Dak Nông, đru ngă tŭ dưn bruă klam răng mgang klei êđăp ênang krĭng Lăn Dap Kngư.