VOV4.Êđê- Lŏ dơ̆ng hlăm hdră bi kƀĭn tal 10, aguah mbrue (19/4) Dhar bruă gĭt gai bruă kƀĭn ala mă klei blŭ kơ hdră bi kƀĭn tal 3, Bruă kƀĭn ala gưl 15. Tui si tĭng klei bi kƀĭn tal 3, Bruă kƀĭn ala srăng bi kƀĭn ênŭm hlăm sang bruă kƀĭn ala. Siămdah, ăt dôk mâo mơh klei mkăp, kơ hdră êlan bi kƀĭn online tơdah mâo bruă čiăng. Tĭng jih jang hrue bi kƀĭn jing 20 hrue. Bruă kƀĭn ala srăng pŏk hlăm knăm sa, hrue 23/5, lehanăn bi ruĕ ti hrue 17/6. Knŭk kna lŏ bi kdŭn hrue ba mdah hdră bhiăn klei kơ lăn ala (lŏ mlih mrâo) kyua hlăm klei dôk mkra mjing hdră bhiăn lŏ mâo lu mta mrâo, čiăng bi mâo hrue lŏ ksiêm duah bi nik. Khua bruă kƀĭn ala Vương Đình Huệ mtă kơ bruă mđing hĭn kơ hnơ̆ng jăk bruă bi klin jih jang klei blŭ mơ̆ng phung bi ala bruă kƀĭn ala trông čhai ti êpul, lehanăn hlăm sang bi kƀĭn, bi mguôp, mprăp bi nik jih jang bruă hâo hưn, hră mơar, bruă klei mrâo, lehanăn djăp mta mnơ̆ng kơ klei mă bruă, gang mkhư̆ klei ruă tưp, đru mprăp bi jăk kơ klei bi kƀĭn./.

 Pô mblang: Y-Khem Niê