VOV4.Êđê- Khua bruă kƀĭn ala Vương Đình Huệ ba mdah leh Hdră mtrŭn mrô 17 thŭn 2022 mơ̆ng Dhar bruă gĭt gai anôk bruă kƀĭn ala gưl 15 kơ ênoh mmông mă bruă thiăm hlăm 1 thŭn, hlăm 1 mlan mơ̆ng mnuih mă bruă hlăm wưng dôk mdrơ̆ng hŏng klei ruă Covid 19 lehanăn hdră krŭ wĭt, mđĭ kyar bruă duh mkra – ala ƀuôn. Dhar bruă gĭt gai anôk bruă kƀĭn ala bi mklă: Tơdah pô ba yua mnuih mă bruă mâo klei čiăng lehanăn mâo klei tŭ ư mơ̆ng mnuih mă bruă snăn dưi yua mnuih mă bruă lŏ mă thiăm 200 mmông ƀiădah amâo êgao 300 mmông hlăm 1 thŭn. Kơ mmông lŏ mă bruă thiăm hlăm 1 mlan, pô ba yua mnuih mă bruă dưi yua phung mă bruă mă bruă thiăm tuič hnơ̆ng 300 mmông hlăm 1 thŭn mbĭt anăn mâo klei tŭ ư mơ̆ng mnuih mă bruă, diñu srăng dưi mă bruă thiăm êbeh 40 mmông ƀiădah amâo êgao ôh 60 mmông hlăm 1 mlan. Bruă kčah mtrŭn mmông mă bruă thiăm ti Hdră mtrŭn anei brei hluê ngă djăp ênŭm klei kčah mtrŭn mkăn djŏ tuôm kơ Hdră bhiăn mnuih mă bruă. Hdră mtrŭn anei dưi ba yua mơ̆ng hruê 1/4/2022./.

                                                    Pô mblang: H’Nêč Êñuôl