VOV4.Êđê- Lŏ dơ̆ng hdră bi kƀĭn kơ bruă hdră bhiăn, aguah anei, Dhar bruă gĭt gai anôk bruă kƀĭn ala brei klei blŭ kơ bruă čih mkra Hdră kčah ksiêm dlăng klei hâo mdah mơ̆ng Êpul ksiêm dlăng Anôk bruă kƀĭn ala kơ bruă “Iêu mtrŭt, kriê dlăng lehanăn ba yua ai dưi, klei mâo mkăp kơ hdră gang mkhư̆ Covid 19”, bruă hluê ngă hdră bhiăn anôk bruă mdrao mgŭn nah gŭ”. Ti klei bi kƀĭn tal 3, anôk bruă kƀĭn ala bi mklă leh Hdră mtrŭn mkŏ mjing Êpul ksiêm dlăng kơ bruă anei. Mta phŭn ksiêm dlăng jing tĭng dlăng boh tŭ dưi mâo, klei êdu kƀah, dleh dlan, bi mklă mta phŭn, bi mklă klei đua klam mơ̆ng dŭm anôk bruă, êpul hlăm hdră ba yua, kriê dlăng ai dưi, klei mâo kơ hdră gang mkhư̆ Covid 19, hluê ngă hdră mtrŭn ti anôk bruă mdrao mgŭn nah gŭ. Mbĭt anăn, ba mdah hdră msir mđĭ boh tŭ mơ̆ng hdră bruă anei lehanăn čih mkra bi leh hdră bhiăn djŏ tuôm./.

                                                    Pô mblang: H’Nêč Êñuôl