VOV4.Êđê - Lŏ dơ̆ng hdră bi kƀĭn tal 9, aguah hruê 15/3, Dhar bruă gĭt gai anôk bruă kƀĭn ala tŭ ư thiăm mbŏ klei đăo tĭng ngăn prăk knŭk kna ênoh duh bi liê amâo lŏ tla wĭt mơ̆ng ala tač êngao thŭn 2020; thiăm mbŏ klei đăo tĭng ngăn prăk knŭk kna ênoh duh bi liê amâo lŏ tla wĭt mơ̆ng ala tač êngao thŭn 2021 čiăng rŏng djăp klei găl bi mklă bruă ngăn prăk knŭk kna. Ti anôk bi kƀĭn, Khua bruă kƀĭn ala Vương Đình Huệ brei thâo, hluê si Hdră bhiăn bruă Ngăn prăk knŭk kna, ênoh đru amâo lŏ tĭng tla tơdah luič liê jing klei đua klam mơ̆ng anôk bruă kriê dlăng knŭk kna. Khua bruă kƀĭn ala mñă, ênoh prăk duh bi liê amâo lŏ tla wĭt brei mâo kleibi mklă lehanăn anei jing bruă mâo klei dưi mơ̆ng anôk bruă kƀĭn ala, Khua bruă kƀĭn ala ăt mtă brei bi ktlah bruă vaccine Covid 19 kbiă mơ̆ng hdră đru lehanăn bi mŭt hlăm bruă mơ̆ng anôk bruă ksiêm tĭng knŭk kna. Hruê anei, 16/3, Dhar bruă gĭt gai anôk bruă kƀĭn ala lui 1 hruê čiăng mkŏ mjing hdră êmuh lehanăn wĭt lač klei êmuh hŏng 2 čô bi ala Anôk bruă kƀĭn ala hlăm knŭk kna. Khua phŭn bruă Tuh tia mnia mblei Nguyễn Hồng Diên lehanăn Khua phŭn bruă Ngăn dŏ wăl hdĭp mda Trần Hồng Hà ti knăm anei mơ̆ng Dhar bruă gĭt gai anôk bruă kƀĭn ala gưl 15./.

H’Nêč pô mblang