VOV4.Êđê - Lŏ dơ̆ng hdră bi kƀĭn tal 9, aguah hruê 23/3, ti sang bruă kƀĭn ala, Dhar bruă gĭt gai anôk bruă kƀĭn ala brei leh klei blŭ kơ klei čih mkra Hdră bhiăn hluê ngă klei ngă phŭn mil pô ti dŭm să, ƀuôn hgŭm, wăl krah. Klei năng mđing, klei čih mkra hdră bhiăn tal anei pŏk mlar bruă hluê ngă klei ngă phŭn mil pô hlăm dŭm êpul êya bruă mbĭt anăn thiăm mbŏ klei bhiăn ksiêm dlăng yang ƀuôn jing klei kčah mtrŭn hlăm Klei čh mkra Hdră bhiăn hluê ngă klei ngă phŭn mil pô ti gưl nah gŭ. Hdră bhiăn anei kñăm bi leh dŭm mta klei hlăm bruă hluê ngă klei ngă phŭn mil pô ti nah gŭ, rơ̆ng klei dưi mơ̆ng knŭk kna hlăm kiê kngan mnuih ƀuôn sang, mñă klă knŭk kna drei jing knŭk kna mơ̆ng mnuih ƀuôn sang, kyua mnuih ƀuôn sang, kơ mnuih ƀuôn sang. Mta mrâo hlăm klei čih mkra hdră bhiăn anei jing thiăm mbŏ klei bhiăn hŏng grăp čô mnuih ƀuôn sang rơ̆ng klei mtăp mđơr, amâo mâo bi kah hlăm bruă hluê ngă klei ngă phŭn mil pô ti nah gŭ, kčah mtrŭn klă klơ̆ng klei dưi lehanăn bruă klam mơ̆ng mnuih ƀuôn sang, knuă druh, mnuih mă bruă hlăm klei hluê ngă klei ngă phŭn mil pô; hlăm anăn thiăm mbŏ klei kčah mtrŭn kơ bruă hluê ngă klei ngă phŭn mil pô ti nah gŭ, klei kčŭt hưn, hưn mdah klei ngă soh hlăm bruă anei./.

H’Nêč pô mblang