VOV4.Êđê -  Lŏ dơ̆ng hlăm klei bi kƀĭn tal 15, aguah anei (14/9) sa mta bruă yuôm bhăn mâo lu mnuih mđing êdi, anăn jing Dhar bruă gĭt gai Bruă kƀĭn ala mă klei blŭ kơ klei hâo mdah boh tŭ ksiêm kơ bruă “Hlue ngă dŭm hdră êlan, klei bhiăn kơ klei mkiêt mkriêm, bi kdơ̆ng hŏng klei bi liê pliă plia wưng thŭn 2016 – 2021”. Anei jing sa hlăm dua mta bruă kñăm ksiêm dlăng gưl dlông mơ̆ng bruă kƀĭn ala hlăm thŭn 2022.

Klei hâo mdah mơ̆ng êpul ksiêm dlăng lač, mbĭt hŏng dŭm boh tŭ dưn mâo leh hlăm bruă tĭng kmkă ngăn prăk bi liê grăp thŭn, jing ka djŏ klă hŏng bruă dôk ngă ôh. Bruă bi mguôp ngăn, lehanăn bi hrŏ dŭm bruă bi liê hlăm dŭm anôk bruă ka yap jing mjêč ôh hlăm wưng thŭn 2016 – 2020 adôk êmưt, prăk mơ̆ng knŭk kna duh bi liê hlăm dŭm anôk bruă knŭk kna duh mkra ka mâo klei hơĭt ôh. Klei kiă kriê, djă yua lăn, ngăn dŏ kluôm mơ̆ng dŭm phŭn dhar bruă alŭ wăl amâo mâo djŏ hŏng klei kčah mtrŭn, ăt adôk mâo klei djă yua soh hŏng klei bhiăn, luič liê ti hơăi muang. Klei djă yua lăn ka mâo klei tŭ dưn, adôk mâo lu hdră čiăng ngă bruă bi kruh, lui êruh prŏng, ba klei luič liê hlăm lu alŭ wăl./.

Y-Khem pô mblang