VOV4.Êđê- Lŏ dơ̆ng hlăm hdră klei kƀĭn gưl tal 10, tlam mbruê 18/4, mâo klei boh blŭ klah čŭn tal êlâo kơ hdră mkăp klei bruă ksiêm duah, Dhar bruă gĭt gai bruă kƀĭn ala mtă, lŏ dơ̆ng rơ̆ng leh anăn mđĭ hĭn kơ klei ksiêm duah gưl kdriêk kñăm gang mkhư̆ klei ƀơ̆ng ngăn, klei amâo jăk, tŭ drông mnuih ƀuôn sang leh anăn msir mgaih dŭm klei kčŭt hưn. Lu klei blŭ mtă brei ksiêm duah, mâo hdră mlih mrâo êpul êya leh anăn bruă ngă mơ̆ng phung ksiêm duah bruă knŭk kna ti gưl kdriêk djŏ guôp hŏng klei klah čŭn, mđĭ hĭn boh tŭ klei ngă bruă. Klei mkŏ mjing bruă ksiêm duah bruă knŭk kna truh kơ ară anei ăt dôk djŏ guôp, đru kơ bruă sang čư êa gưl kdriêk kơ bruă ksiêm duah, gang mkhư̆ klei ƀơ̆ng ngăn, klei amâo mâo jăk, tŭ drông mnuih ƀuôn sang leh anăn msir mgaih dŭm klei kčŭt hưn. Hluê si hdră, aguah anei, Dhar bruă gĭt gai bruă kƀĭn ala srăng brei boh blŭ kơ hdră ksiêm dlăng mơ̆ng bruă kƀĭn ala, bruă mprăp kơ klei kƀĭn tal 3 mơ̆ng bruă kƀĭn ala leh anăn ksiêm dlăng, bi klă ênoh phung ngă bruă mơ̆ng Dhar bruă ksiêm duah anôk bruă ksiêm dlăng mnuih ƀuôn sang gưl dlông.

Pô mblang: Y-Ƀel Êban