VOV4.Êđê- Lŏ dơ̆ng klei kƀĭn gưl 13, aguah anei 12/7, Dhar bruă gĭt gai bruă kƀĭn ala ksiêm wĭt klei kƀĭn tal 3 leh anăn brei klei blŭ mprăp kơ klei kƀĭn tal 4, bruă kƀĭn ala gưl 15. Hlăm klei kƀĭn tal 3, bruă kƀĭn ala bi klă 5 klei bhiăn, 17 hdră mtrŭn, brei klei blŭ kơ 6 hdră klei bhiăn mkăn leh anăn dŭm hdră mtrŭn mâo mta phŭn yuôm bhăn amâo djŏ knŏng ti thŭn 2022, ƀiădah wăt kơ wưng thŭn 2021 – 2025 leh anăn dŭm thŭn kơ anăp. Bi kơ bruă mprăp dŭm mta phŭn hlăm klei kƀĭn tal 4, Khua bruă kƀĭn ala Vương Đình Huệ brei thâo: Klei kƀĭn mâo boh blŭ phŭn kơ bruă mprăp klei kƀĭn tal 4 mĭn tĭng mkŏ mjing ti mlan 10 thŭn anei. hlăm klei kƀĭn, mta kñăm jing bruă čih mkra klei bhiăn, bi klă lu hdră klei bhiăn, mâo boh blŭ phŭn kơ lu hdră klei bhiăn. Hŏng ênoh bruă čih mkra klei bhiăn lu msĕ sơnăn, bruă mprăp, bi mguôp hŏng knŭk kna hlăm bruă čih mkra, anôk bruă bi klă, si srăng ngă čiăng kơ klei kƀĭn tal 4 mkŏ mjing djŏ hŏng hdră kčah leh anăn mâo boh tŭ dưn hĭn.

Pô mblang: Y-Ƀel Êban