VOV4.Êđê- Lŏ dơ̆ng hdră bi kƀĭn tal 9, hrue 14/3, Dhar bruă gĭt gai Bruă kƀĭn ala hmư̆ klei hâo hưn boh ksiêm dlăng mơ̆ng êpul ksiêm dlăng boh tŭ dưn tal êlâo kơ bruă “hlue ngă dŭm hdră mtrŭn mơ̆ng Dhar bruă gĭt gai Bruă kƀĭn ala kơ klei dăp wĭt bruă knuă ti bruă sang čư̆ êa gưl kdriêk lehanăn să” lehanăn ngă bruă drông phung ƀuôn sang lehanăn mghaih msir klei kčŭt hưn”. 3 thŭn êgao, kluôm ala hrŏ truh 3 êbâo 437 anôk bruă gưl să, lehanăn 429 anôk bruă gưl kdriêk, bi hrŏ mâo 706 čô knuă druh gưl kdriêk, 9 êbâo 694 čô knuă druh gưl să, lehanăn 8 êbâo 448 čô mnuih ngă bruă amâo mâo truăn mkăn hlăm gưl să. Wưng thŭn 2019 -2021 mâo mkriêm leh êbeh 2 êbâo êklai prăk, mơ̆ng anăn, lŏ mâo klei duh bi liê mđĭ kyar bruă duh mkra ala ƀuôn, hlue ngă jih jang hdră êlan kơ klei hdĭp mda, mđĭ klei hdĭp phung ƀuôn sang. Hluê ngă hdră drông phung ƀuôn sang nao bi kčŭt hưn, noh kđi klei mâo mghaih msir hrŏ./.

         Pô mblang: Y-Khem Niê