VOV4.Êđê - Aguah mbrue (27/6), Trần Quang Phương, k’iăng khua bruă kƀĭn ala mâo leh mmông mă bruă hŏng phung khua kiă kriê čar Khánh Hoà kơ bruă mghaih msir klei bi kčŭt. Tui si klei hâo mdah, mơ̆ng thŭn 2016 – 2021, klei bi kčŭt hlăm čar Khánh Hoà đĭ lu êbeh 150% mkă hŏng 5 thŭn êlâo anăn. Wưng anei mâo êbeh 6 êbâo 600 pŏk hră ba kčŭt, hlăm anăn mâo truh 70% jing hră akâo mghaih msir, lehanăn dŭm adôk jing hră kčŭt akâo phat kđi.

Čar Khánh Hoà mâo hĕ lu klei bi kčŭt anei kyua mâo rŭ mkra lu bruă prŏng, ênoh mnuih, lehanăn ênhă lăn hmăi djŏ mơ̆ng dŭm hdră rŭ mkra lu, ƀiădah hdră êlan đru lehanăn klei čiu hnô amâo mâo năng ôh. Êjai anăn, bruă sang čư̆ êa kiă kriê amâo mâo kjăp ôh, mâo dŭm anôk bruă êpul êya mghaih msir kơ phung ƀuôn sang amâo mâo pral ôh. Wưng thŭn 2016 – 2021, čar Khánh Hoà mâo tŭ jum leh giăm 13 êbâo gưl čô mnuih, hŏng giăm 9 êbâo 800 boh klei, hlăm anăn mâo truh 133 êpul lu mnuih, hŏng lu mta klei dôk dleh mghaih msir./.

            Y-Khem pô mblang