VOV4.Êđê - Lŏ dơ̆ng dŭm hdră hlăm klei kƀĭn tal 9, aguah mbruê, Dhar bruă gĭt gai bruă kƀĭn ala ksiêm dlăng leh klei hưn mdah phŭn kčưm mơ̆ng êpul ksiêm dlăng hdră mkăp “Bruă hluê ngă hdră mtrŭn, klei bhiăn ala čar kơ klei mkiêt mkriêm, gang mkhư̆ klei luč liê ti mang wưng thŭn 2016 -2022” leh anăn klei bi klă čuăn ruah anôk bruă, alŭ wăl ngă klei ksiêm dlăng. Hdră mkăp anei srăng đru mguôp yuôm bhăn hlăm bruă mkiêt mkriêm ai dưi ala čar kơ mnuih mă bruă, kdrăp yua, klei thâo. Kyuanăn, bruă bi klă mta kñăm leh anăn hdră ksiêm dlăng klă klơ̆ng hŏng grăp phŭn bruă, dhar bruă, alŭ wăl, bi klă dŭm mta bruă mâo klei bi knăl luč liê mang, ksiêm êmuh, bi klă dŭm klei anăn jing mta phŭn mâo phung bi ala leh anăn mnuih ƀuôn sang uêñ mĭn leh anăn ktuê dlăng. Hruê anei 24/3, Dhar bruă gĭt gai bruă kƀĭn ala ăt ksiêm dlăng, bi klă hdră mkăp, hdră mtrŭn kơ klei ngă bruă ksiêm êmuh hlăm klei kƀĭn tal 9.

Y-Ƀel pô mblang