VOV4.Êđê - Lŏ dơ̆ng hlăm klei bi kƀĭn tal 10, hrue anei, Dhar bruă gĭt gai bruă kƀĭn ala mă leh klei blŭ kơ bruă čih mkra hdră bhiăn bi kdơ̆ng hŏng klei ngă jhat hlăm găp djuê (lŏ mlih mrâo). Klei čih mkra hdră bhiăn anei, tui si klei čoh čuăn djŏ hŏng bruă răng mgang klei dưi êngiê kơ jih jang mnuih hlăm gŏ sang, bi kdơ̆ng hŏng klei nga jhat hlăm găp djuê, mâo dŭm hdră êlan bi răng mgang, klei đru mgang, lehanăn hdră phat mkra phung ngă soh, bruă đua klam mơ̆ng dŭm anôk bruă, êpul êya, lehanăn găp djuê, grăp čô mnuih hlăm bruă gang mkhư̆ klei ngă jhat hlăm găp djuê. Hdră bi mlih klei bhiăn anei ba yua djŏ hŏng klei tơdah ung mô̆ bi lui, thâodah bi dôk jing msĕ si ung mô̆ leh ƀiădah amâo mâo nao ngă hră mơar bi dôk ung mô̆ ôh. Klei bhiăn anei ăt čoh čuăn kơ ya mta klei soh kăm amâo mâo dưi ngă jing: Klei mgô̆, klei mčŭt mčhur, đru kơ mnuih mkăn ngă jhat kơ mnuih hlăm găp djuê. Đru mgang, lehanăn mdăp klei ngă jhat hlăm găp djuê. Nga bi hêñ, lehanăn bi hing, ngă bi msoh klei mâo sĭt kơ klei ngă jhat hlăm găp djuê hŏng lu êlan./.

Y-Khem pô mblang