VOV4.Êđê - Lŏ dơ̆ng hlăm klei bi kƀĭn kơ bruă hdră bhiăn mlan 9, hrue anei (21/9), Dhar bruă gĭt gai bruă kƀĭn ala mă klei blŭ kơ bruă hlak mblang, tŭ mă, bi mlih kơ hdră bhiăn mkă dlăng lehanăn mdrao mgŭn (lŏ mlih mrâo). Dŭm klei blŭ mơ̆ng phung bi ala ti anôk bi kƀĭn tal 3, truh kơ klei čih mkra hdră bhiăn anei lŏ mlih mrâo čoh čuăn kơ ênoh prăk bi liê kơ bruă mkă dlăng, mdrao mgŭn, mâo tĭng mkă djăp ênŭm kơ klei bi liê, djŏ guôp hŏng klei dưi tĭng tla, lehanăn mđĭ hĭn klei mdrao mgŭn bi mâo klei tŭ dưn, mđĭ kyar kdrăp mdrao mgŭn.

Êlâo anăn, ti anôk bi kƀĭn phung bi ala mâo leh lu klei blŭ kơ klei bhiăn hlăm bruă mkă dlăng, mdrao mgŭn lehanăn kơ jih jang bruă blei mprăp kdrăp mdrao mgŭn ti dŭm boh sang êa drao knŭk kna, kñăm dưi mâo djăp klei jăk hlăm bruă mdrao mgŭn. Phung bi ala lač, klei dôk kpăk gun hĭn, lehanăn yuôm bhăn hĭn hŏng bruă mdrao mgŭn ară anei, jing klei bi hgŭm bruă mdrao mgŭn knŭk kna lehanăn êngao knŭk kna, mơ̆ng anăn lăm lui hĕ klei pia yang ƀuôn mă bruă mbĭt hlăm klei mdrao mgŭn. Kyuadah jing amâo mâo klă ôh pia hĕ yang ƀuôn hŏng hdră mdê bi pô duh bi liê prăk mbĭt hŏng sang êa drao blei mprăp kdrăp mdrao mgŭn, dưm hlăm sang êa drao yua lehanăn mbha prăk mnga./.

Y-Khem pô mblang