VOV4.Êđê- Tlam mbrue (15/9), mă klei blŭ mprăp kơ klei bi kƀĭn tal 4, Bruă kƀĭn ala gưl 15, Knơ̆ng khua čih hră bruă kƀĭn ala Bùi Văn Cường brei thâo, mkă hruê bi kƀĭn tal 4 jing hlăm brô 23 hrue mkrah. Bruă kƀĭn ala srăng pŏk klei bi kƀĭn hlăm hrue 20/10. Ñu lŏ brei thâo, knŭk kna akâo thiăm mbŏ dŭm mta bruă kơ bruă kƀĭn ala ksiêm dlăng, bi klă klei čuăl mkă kluôm wưng thŭn 2021 – 2030, lehanăn tă hdră truh kơ thŭn 2050, ba mdah kơ anôk bruă kƀĭn ala ksiêm kơ bruă mkăp klei dưi mkra mjing mrô êdeh ôtô hŏng klei bi lông, lehanăn bi klă hdră mtrŭn lông ba yua dŭm hdră êlan hjăn kơ ƀuôn prŏng Ƀuôn Ama Thuôt, čar Daklak, lehanăn mghaih msir djăp mta klei gun kpăk, klei ka djŏ mơ̆ng dŭm anôk hrui prăk tăk êlan klông BOT...

Leh klei anăn dhar bruă gĭt gai bruă kƀĭn ala bi kƀĭn bi ruĕ klei bi kƀĭn tal 15, blŭ bi ruĕ, Khua bruă kƀĭn ala Vương Đình Huệ mtă kơ jih jang anôk bruă bi leh jih jang klei hâo mdah kơ klei ksiêm kơ bruă truăn, hâo mdah boh tŭ dưn klei ksiêm kơ bruă truăn “Hluê ngă dŭm hdră êlan kơ klei bhiăn mkiêt mkriêm bi kdơ̆ng hŏng klei bi liê plă plia wưng thŭn 2016 – 2021”, ba mdah kơ anôk bi kƀĭn tal 4, bruă kƀĭn ala gưl 15./.

Pô mblang: Y-Khem Niê