VOV4.Êđê - Lŏ dơ̆ng hdră hlăm klei kƀĭn tal 15, aguah anei 15/9, Dhar bruă kƀĭn ala brei klei blŭ kơ bruă mprăp klei kƀĭn tal 4, bruă kƀĭn ala gưl 15. Hluê si klei hưn, klei kƀĭn tal 4, bruă kƀĭn ala srăng bi kƀĭn, mă bruă hlăm 22 hruê, klei kƀĭn mkăp leh anăn kčưm pŏk ti hruê 20/10. Klei kƀĭn mĭn tĭng srăng bi klă 6 hdră klei bhiăn, 1 hdră mtrŭn leh anăn brei klei blŭ hŏng 7 hdră klei bhiăn. Bruă kƀĭn ala mđing hmư̆ klei hưn leh anăn bi trông kơ boh tŭ bruă hluê ngă hdră mđĭ kyar bruă duh mkra – ala ƀuôn thŭn 2023, tĭng mkă ngăn prăk knŭk kna leh anăn hdră mkăp brei ngăn prăk gưl dlông thŭn 2023. Ksiêm dlăng klei hưn mơ̆ng Sang phat kđi gưl dlông, khua kiă kriê sang phat kđi gưl dlông, klei hưn mdah mơ̆ng knŭk kna kơ bruă gang mkhư̆ klei ƀơ̆ng ngăn, phung ngă soh, klei ƀuah mkra thŭn 2022. Ksiêm dlăng klei hưn mdah, bi klă bruă hluê ngă hdră mtrŭn mrô 30 kơ dŭm hdră êlan gang mkhư̆ klei ruă tưp Covid-19.

Y-Ƀel pô mblang